akaD shah mal-dar ho gaya

akaḌ shaah ġhamgīn har aan thā

vo ġhurbat ke maare pareshān thā

vo bistar pe ik raat rone lagā

usī rone-dhone meñ sone lagā

uThā jab vo so kar to bīmār thā

ba-dastūr ġhurbat se bezār thā

purānī sī ik chārpā.ī thī bas

badan par phaTī ik razā.ī thī bas

davā doctor se vo lene gayā

davā doctor de ke kahne lagā

ki mahsūs mujh ko huī shai ajiib

badan meñ tumhāre vo dil ke qarīb

huī is davā.ī se matlī use

achānak huī ek ulTī use

chamaktā sā hiirā barāmad huā

akaḌ shaah hairān az-had huā

vo hiirā akaḌ shaah ne bech kar

kiyā hāsil apne liye māl-o-zar

huā mulk bhar meñ vo ab māl-dār

huā ahl-e-sarvat meñ us kā shumār

vo apnī amīrī meñ yuuñ kho gayā

farāmosh sab dostoñ ko kiyā

go scōter us ne na sīkhī kabhī

tijārat na kar paayā vo aam kī

the ab us kī gaaḌī meñ ḳhuddām bhī

vo khātā thā mahñge se ab aam bhī

vo ab inkisārī se anjān thā

akaḌ shaah goyā akaḌ shaan thā

masahrī pe ik raat sone gayā

vo kambal kī bāñhoñ meñ khone gayā

maze se vo so so ke juuñ hī uThā

ajab sā ik ehsās us ko huā

masahrī nahīñ chārpā.ī thī vo

vo kambal nahīñ thā razā.ī thī vo

tavīl aur achchhā sā ye ḳhvāb thā

khulā ab bhī iflās kā baab thā

'usāma' se qisse akaḌ shaah ke

na jāoge sun kar binā vaah ke

akaD shah ghamgin har aan tha

wo ghurbat ke mare pareshan tha

wo bistar pe ek raat rone laga

usi rone-dhone mein sone laga

uTha jab wo so kar to bimar tha

ba-dastur ghurbat se bezar tha

purani si ek chaarpai thi bas

badan par phaTi ek razai thi bas

dawa doctor se wo lene gaya

dawa doctor de ke kahne laga

ki mahsus mujh ko hui shai ajib

badan mein tumhaare wo dil ke qarib

hui is dawai se matli use

achanak hui ek ulTi use

chamakta sa hira baramad hua

akaD shah hairan az-had hua

wo hira akaD shah ne bech kar

kiya hasil apne liye mal-o-zar

hua mulk bhar mein wo ab mal-dar

hua ahl-e-sarwat mein us ka shumar

wo apni amiri mein yun kho gaya

faramosh sab doston ko kiya

go scooter us ne na sikhi kabhi

tijarat na kar paya wo aam ki

the ab us ki gaDi mein KHuddam bhi

wo khata tha mahnge se ab aam bhi

wo ab inkisari se anjaan tha

akaD shah goya akaD shan tha

masahri pe ek raat sone gaya

wo kambal ki banhon mein khone gaya

maze se wo so so ke jun hi uTha

ajab sa ek ehsas us ko hua

masahri nahin chaarpai thi wo

wo kambal nahin tha razai thi wo

tawil aur achchha sa ye KHwab tha

khula ab bhi iflas ka bab tha

'usama' se qisse akaD shah ke

na jaoge sun kar bina wah ke