apahij gaDi ka aadmi

kuchh aaise haiñ jo zindagī ko mah-o-sāl se nāpte haiñ

gosht se saag se daal se nāpte haiñ

ḳhat-o-ḳhāl se gesuoñ kī mahak chaal se nāpte haiñ

sa.ūbat se janjāl se nāpte haiñ

yā apne a.amāl se nāpte haiñ

magar ham ise azm-e-pāmāl se nāpte haiñ

ye lamha jo guzrā mire ḳhuun kī us meñ surḳhī milī hai?

mire āñsuoñ kā namak is kī lazzat meñ shāmil huā hai?

pasīne se girdāb-e-sāhil huā hai?

ye lā kā safar lā rahegā ki kuchh is kā hāsil huā hai

ki jaise thī barsoñ se vaisī hī tishna-dilī hai?

meñ kab se zamīñ par zamīñ kī tarah chal rahā huuñ

ye dīvāna andhā safar kab kahāñ jā ke chhoḌegā mujh ko?

maiñ is zindagī kī bahut sī bahāreñ ġhizā kī tarah khā chukā huuñ

pahan oḌh kar pairahan kī tarah phaaḌ dī haiñ

meñ resham kā kiiḌā huuñ ko.e meñ chhap jaatā huuñ Dar ke maare

isī ko.e ko khātā rahtā huuñ aur kaaT kar is se aatā huuñ bāhar

aur apne jiine kā maqsad sabab jānñā chāhtā huuñ

mirā dil ḳhudā kī razā DhūñDhtā phir rahā hai

mirā jism lazzāt kī justujū meñ lagā hai

guzargāh-e-shām-o-sahar par kahīñ ek din maiñ ugā thā

nabātāt kī tarah jiitā huuñ is kārgāh-e-jahāñ meñ

na ehsās īmān īqān koī

na duniyā meñ shāmil na ḳhud apnī pahchān koī

gunah aur jahannam savāb aur jannat?

ye kyuuñ hai ki be-muzad kuchh bhī nahīñ mil sakā hai

na kal mil sakegā

asātīr farmāñ-ravāon ke ahkām aur sūfiyā kī karāmat ke qisse

payambar kī dil-soziyoñ ke mazāhir

qalam-band haiñ sab!

unheñ ham ne ta.avīz kī tarah apne galoñ meñ hamā.il kiyā hai

inheñ ham ne tah-ḳhānoñ kī koTharī meñ muqaffal kiyā hai

jahāñ laḌkhaḌāte haiñ in kī madad le ke chalte haiñ aage

magar rāstoñ kā ta.ayyun nahīñ hai!

maiñ bikhrā huā aadmī huuñ

mirī zehnī bīmāriyoñ kā sabab ye zamīñ hai

maiñ us din se Dartā huuñ jab barf saarī pighal kar

ise ġharq kar de

na.e āsmānī havādis

sifar meñ badal deñ

yā aadmī apne a.amāl se ḳhud

ise ik kahānī banā de

zamīñ shora pushtoñ kī āmāj-gah ban ga.ī hai

ḳhudā ek hai yuuñ to vāvian meñ saaf likkhā huā hai

magar zer-e-vāvain bhī chhoTī chhoTī bahut taḳhtiyāñ haiñ

jalī harf jin ke bahut ummatoñ kā pata de rahe haiñ

jo ye taḳhtiyāñ apnī gardan meñ laTkā.e

zunnār pahne hue koī tasbīh thāme

apnī gard-e-safar ke dhund meñ lipTe chale jā rahe haiñ

zaitūn kī shāḳh tulsī ke patte

havā meñ uḌe jā rahe haiñ

chiyūñTiyoñ kī qatāreñ qaran-dar-qaran

muḳhtalif pech-dar-pech rāhoñ se guzrī chalī jā rahī haiñ

saikaḌoñ sar kaTe dhaḌ bahut rāstoñ par paḌe haiñ

havan ho rahe haiñ

yag ke mantroñ kī sadā

aag meñ jalne vaalī sāmagrī kī bahut tez bū

har taraf phail kar bas ga.ī hai havā meñ

aur vavain kī qaid meñ jo ḳhudā hai

lā-makāñ se

jo hotā hai hotā rahegā

baiThā chup-chāp sab dekhtā hai

ham bhī kyuuñ na ḳhudā kī tarah yūñhī chup saadh leñ

peḌ paudoñ kī mānind jiite raheñ

zab.h hote raheñ!

vo duā.eñ jo bārūd kī bū meñ bas kar

bhaTaktī huī zer-e-arsh-e-barīñ phir rahī haiñ

unheñ bhuul jaa.eñ

zindagī ko ḳhudā kī atā jaan kar zehn mā.ūf kar leñ

yāva-goī meñ yā zehnī hizyān meñ ḳhud ko masrūf kar leñ

un meñ mil jaa.eñ jo zindagī ko

gosht se saag se daal se nāpte haiñ

mah-o-sāl se nāpte haiñ

apnā hī ḳhuun piine lage haiñ

chāk-dāmāniyāñ ġham se siine lage haiñ

kuchh aaise hain jo zindagi ko mah-o-sal se napte hain

gosht se sag se dal se napte hain

KHat-o-KHal se gesuon ki mahak chaal se napte hain

saubat se janjal se napte hain

ya apne aamal se napte hain

magar hum ise azm-e-pamal se napte hain

ye lamha jo guzra mere KHun ki us mein surKHi mili hai?

mere aansuon ka namak is ki lazzat mein shamil hua hai?

pasine se girdab-e-sahil hua hai?

ye la ka safar la rahega ki kuchh is ka hasil hua hai

ki jaise thi barson se waisi hi tishna-dili hai?

mein kab se zamin par zamin ki tarah chal raha hun

ye diwana andha safar kab kahan ja ke chhoDega mujh ko?

main is zindagi ki bahut si bahaaren ghiza ki tarah kha chuka hun

pahan oDh kar pairahan ki tarah phaD di hain

mein resham ka kiDa hun koe mein chhap jata hun Dar ke mare

isi koe ko khata rahta hun aur kaT kar is se aata hun bahar

aur apne jine ka maqsad sabab jaanna chahta hun

mera dil KHuda ki raza DhunDhta phir raha hai

mera jism lazzat ki justuju mein laga hai

guzargah-e-sham-o-sahar par kahin ek din main uga tha

nabaatat ki tarah jita hun is kargah-e-jahan mein

na ehsas iman iqan koi

na duniya mein shamil na KHud apni pahchan koi

gunah aur jahannam sawab aur jannat?

ye kyun hai ki be-muzad kuchh bhi nahin mil saka hai

na kal mil sakega

asatir farman-rawaon ke ahkaam aur sufiya ki karamat ke qisse

payambar ki dil-soziyon ke mazahir

qalam-band hain sab!

unhen hum ne tawiz ki tarah apne galon mein hamail kiya hai

inhen hum ne tah-KHanon ki koThari mein muqaffal kiya hai

jahan laDkhaDate hain in ki madad le ke chalte hain aage

magar raston ka tayyun nahin hai!

main bikhra hua aadmi hun

meri zehni bimariyon ka sabab ye zamin hai

main us din se Darta hun jab barf sari pighal kar

ise gharq kar de

nae aasmani hawadis

sifar mein badal den

ya aadmi apne aamal se KHud

ise ek kahani bana de

zamin shora pushton ki aamaj-gah ban gai hai

KHuda ek hai yun to wawian mein saf likkha hua hai

magar zer-e-wawain bhi chhoTi chhoTi bahut taKHtiyan hain

jali harf jin ke bahut ummaton ka pata de rahe hain

jo ye taKHtiyan apni gardan mein laTkae

zunnar pahne hue koi tasbih thame

apni gard-e-safar ke dhund mein lipTe chale ja rahe hain

zaitun ki shaKH tulsi ke patte

hawa mein uDe ja rahe hain

chiyunTiyon ki qataren qaran-dar-qaran

muKHtalif pech-dar-pech rahon se guzri chali ja rahi hain

saikaDon sar kaTe dhaD bahut raston par paDe hain

hawan ho rahe hain

yag ke mantron ki sada

aag mein jalne wali samagri ki bahut tez bu

har taraf phail kar bas gai hai hawa mein

aur wawain ki qaid mein jo KHuda hai

la-makan se

jo hota hai hota rahega

baiTha chup-chap sab dekhta hai

hum bhi kyun na KHuda ki tarah yunhi chup sadh len

peD paudon ki manind jite rahen

zabh hote rahen!

wo duaen jo barud ki bu mein bas kar

bhaTakti hui zer-e-arsh-e-barin phir rahi hain

unhen bhul jaen

zindagi ko KHuda ki ata jaan kar zehn mauf kar len

yawa-goi mein ya zehni hizyan mein KHud ko masruf kar len

un mein mil jaen jo zindagi ko

gosht se sag se dal se napte hain

mah-o-sal se napte hain

apna hi KHun pine lage hain

chaak-damaniyan gham se sine lage hain