aksar main sochta hun

kaise banā.ī tū ne ye kā.enāt pyārī

hairān ho rahī hai aql-o-ḳhirad hamārī

kaliyāñ mahak rahī haiñ e.ajāz hai ye terā

ḳhushbū kahāñ se aa.ī ik raaz hai ye terā

bulbul ke chahchahoñ ne hairān kar diyā hai

insāñ ke qahqahoñ ne hairān kar diyā hai

shashdar huuñ dekh ke maiñ uḌte haiñ kaise panchhī

dariyā meñ dekhtā huuñ jaate haiñ kaise māñjhī

kis tarah be-sutūñ ye tū ne falak banāyā

āñchal ko tū ne us ke bāroñ se jagmagāyā

kis tarah kī haiñ paidā barsāt kī ghaTā.eñ

kis tarah chal rahī haiñ pur-kaif ye havā.eñ

dariyā pahāḌ jañgal kis tarah ban ga.e haiñ

ye baat aql vaale har vaqt sochte haiñ

kis tarah tū ne maulā insān ko banāyā

aksar maiñ sochtā huuñ kaisā hai tū ḳhudāyā

kaise banai tu ne ye kaenat pyari

hairan ho rahi hai aql-o-KHirad hamari

kaliyan mahak rahi hain eajaz hai ye tera

KHushbu kahan se aai ek raaz hai ye tera

bulbul ke chahchahon ne hairan kar diya hai

insan ke qahqahon ne hairan kar diya hai

shashdar hun dekh ke main uDte hain kaise panchhi

dariya mein dekhta hun jate hain kaise manjhi

kis tarah be-sutun ye tu ne falak banaya

aanchal ko tu ne us ke baron se jagmagaya

kis tarah ki hain paida barsat ki ghaTaen

kis tarah chal rahi hain pur-kaif ye hawaen

dariya pahaD jangal kis tarah ban gae hain

ye baat aql wale har waqt sochte hain

kis tarah tu ne maula insan ko banaya

aksar main sochta hun kaisa hai tu KHudaya