alaw

rāt-bhar sard havā chaltī rahī

rāt-bhar ham ne alaao taapā

maiñ ne maazī se ka.ī ḳhushk sī shāḳheñ kāTīñ

tum ne bhī guzre hue lamhoñ ke patte toḌe

maiñ ne jeboñ se nikālīñ sabhī sūkhī nazmeñ

tum ne bhī hāthoñ se murjhā.e hue ḳhat khole

apnī in āñkhoñ se maiñ ne ka.ī māñje toḌe

aur hāthoñ se ka.ī baasī lakīreñ pheñkīñ

tum ne palkoñ pe namī suukh ga.ī thī so girā dī

raat bhar jo bhī milā ugte badan par ham ko

kaaT ke Daal diyā jalte alaao meñ use

rāt-bhar phū.koñ se har lau ko jagā.e rakkhā

aur do jismoñ ke īñdhan ko jalā.e rakkhā

rāt-bhar bujhte hue rishte ko taapā ham ne

raat-bhar sard hawa chalti rahi

raat-bhar hum ne alao tapa

main ne mazi se kai KHushk si shaKHen kaTin

tum ne bhi guzre hue lamhon ke patte toDe

main ne jebon se nikalin sabhi sukhi nazmen

tum ne bhi hathon se murjhae hue KHat khole

apni in aankhon se main ne kai manje toDe

aur hathon se kai basi lakiren phenkin

tum ne palkon pe nami sukh gai thi so gira di

raat bhar jo bhi mila ugte badan par hum ko

kaT ke Dal diya jalte alao mein use

raat-bhar phukon se har lau ko jagae rakkha

aur do jismon ke indhan ko jalae rakkha

raat-bhar bujhte hue rishte ko tapa hum ne