albeli subh

nazar jhukā.e urūs-e-fitrat jabīñ se zulfeñ haTā rahī hai

sahar kā taarā hai zalzale meñ ufuq kī lau thartharā rahī hai

ravish ravish naġhma-e-tarab hai chaman chaman jashn-e-rañg-o-bū hai

tuyūr shāḳhoñ pe haiñ ġhazal-ḳhvāñ kalī kalī gungunā rahī hai

sitāra-e-sub.h kī rasīlī jhapaktī āñkhoñ meñ haiñ fasāne

nigār-e-mahtāb kī nashīlī nigāh jaadū jagā rahī hai

tuyūr bazm-e-sahar ke mutrib lachaktī shāḳhoñ pe gā rahe haiñ

nasīm firdaus kī sahelī guloñ ko jhūlā jhulā rahī hai

kalī pe bele kī kis adā se paḌā hai shabnam kā ek motī

nahīñ ye hiire kī kiil pahne koī parī muskurā rahī hai

sahar ko madd-e-nazar haiñ kitnī ri.āyteñ chashm-e-ḳhūñ-fishāñ kī

havā bayābāñ se aane vaalī lahū meñ surḳhī baḌhā rahī hai

shalūkā pahne hue gulābī har ik subuk pañkhuḌī chaman meñ

rañgī huī surḳh oḌhnī kā havā meñ pallū sukhā rahī hai

falak pe is tarah chhup rahe haiñ hilāl ke gird-o-pesh taare

ki jaise koī na.ī navelī jabīñ se afshāñ chhuḌā rahī hai

khaTak ye kyuuñ dil meñ ho chalī phir chaTaktī kaliyo? zarā Thaharnā

havā-e-gulshan kī narm ro meñ ye kisī kī āvāz aa rahī hai?

nazar jhukae urus-e-fitrat jabin se zulfen haTa rahi hai

sahar ka tara hai zalzale mein ufuq ki lau tharthara rahi hai

rawish rawish naghma-e-tarab hai chaman chaman jashn-e-rang-o-bu hai

tuyur shaKHon pe hain ghazal-KHwan kali kali gunguna rahi hai

sitara-e-subh ki rasili jhapakti aankhon mein hain fasane

nigar-e-mahtab ki nashili nigah jadu jaga rahi hai

tuyur bazm-e-sahar ke mutrib lachakti shaKHon pe ga rahe hain

nasim firdaus ki saheli gulon ko jhula jhula rahi hai

kali pe bele ki kis ada se paDa hai shabnam ka ek moti

nahin ye hire ki kil pahne koi pari muskura rahi hai

sahar ko madd-e-nazar hain kitni riayten chashm-e-KHun-fishan ki

hawa bayaban se aane wali lahu mein surKHi baDha rahi hai

shaluka pahne hue gulabi har ek subuk pankhuDi chaman mein

rangi hui surKH oDhni ka hawa mein pallu sukha rahi hai

falak pe is tarah chhup rahe hain hilal ke gird-o-pesh tare

ki jaise koi nai naweli jabin se afshan chhuDa rahi hai

khaTak ye kyun dil mein ho chali phir chaTakti kaliyo? zara Thaharna

hawa-e-gulshan ki narm ro mein ye kisi ki aawaz aa rahi hai?