album

harī masjid kī halkī dhuup meñ

taaza vazū se giile paañv

aur Tapaktī āstīnoñ kī chamak meñ log the

jo saf-ba-saf

apnā janāza paḌh rahe the

sadar darvāze se

ik bārūd meñ Duubā huā

jannat kā saTTā-bāz aur hūroñ kā saudāgar

achānak sahv kā sajda adā karne ko aayā

aur harī masjid ne apnā rañg badlā

qurmuzī dahlīz par jitne bhī juute the

vo taaza ḳhuun par pahle to tere

aur phir

jamte lahū par jam ga.e

maiñ bachpan meñ

ka.ī mulkoñ ke sikke aur Ticketeñ jamā kartā thā

bayāz-e-zehn ke tārīk pannoñ par

maiñ ab jismoñ ke TukḌe jamā kartā huuñ

mirī album ke safhoñ kī tahoñ se ḳhuuñ nikaltā hai

mirī āñkhoñ se ristā hai

hari masjid ki halki dhup mein

taza wazu se gile panw

aur Tapakti aastinon ki chamak mein log the

jo saf-ba-saf

apna janaza paDh rahe the

sadar darwaze se

ek barud mein Duba hua

jannat ka saTTa-baz aur huron ka saudagar

achanak sahw ka sajda ada karne ko aaya

aur hari masjid ne apna rang badla

qurmuzi dahliz par jitne bhi jute the

wo taza KHun par pahle to tere

aur phir

jamte lahu par jam gae

main bachpan mein

kai mulkon ke sikke aur Ticketen jama karta tha

bayaz-e-zehn ke tarik pannon par

main ab jismon ke TukDe jama karta hun

meri album ke safhon ki tahon se KHun nikalta hai

meri aankhon se rista hai