alf-e-laila ki aaKHiri subh

fasāna kaise baḌhe

na koī sāhir-e-pazhmurda sin na saudāgar

na chiin se koī aa.e na bāḳhtar se koī

balaḳh ke shahr meñ aur qaaf ke paristāñ meñ

koī parī na parī-zād kaun aa.egā

fasāna kaise baḌhe

vilāyatoñ ke faristād-gān-e-ishq to kyā

kanār-e-bahr pe qazzāq bhī nahīñ koī

azā-kuninda-e-shab hai na hai payāmi-e-sub.h

na dasht-e-rah-zadagāñ meñ hai sabz-posh koī

na devtā hai na autār haiñ na paiġhambar

fasāna kaise baḌhe

hazāroñ rātoñ kī vo dāstāñ tamām huī

hazāroñ qissoñ kī vo raat ḳhatm par aa.ī

bahāna koī nahīñ

bas ab ki ma.āl-e-shikast-e-bayāñ kī baarī hai

fasāna koī nahīñ ab to jaañ kī baarī hai

fasana kaise baDhe

na koi sahir-e-pazhmurda sin na saudagar

na chin se koi aae na baKHtar se koi

balaKH ke shahr mein aur qaf ke paristan mein

koi pari na pari-zad kaun aaega

fasana kaise baDhe

wilayaton ke faristad-gan-e-ishq to kya

kanar-e-bahr pe qazzaq bhi nahin koi

aza-kuninda-e-shab hai na hai payami-e-subh

na dasht-e-rah-zadagan mein hai sabz-posh koi

na dewta hai na autar hain na paighambar

fasana kaise baDhe

hazaron raaton ki wo dastan tamam hui

hazaron qisson ki wo raat KHatm par aai

bahana koi nahin

bas ab ki maal-e-shikast-e-bayan ki bari hai

fasana koi nahin ab to jaan ki bari hai