alfaz

ye lafz suqrāt lafz iisā

maiñ in kā ḳhāliq ye mere ḳhāliq

yahī azal haiñ yahī abad haiñ yahī zamāñ haiñ yahī makāñ haiñ

ye zehn-tā-zehn rah-guzar haiñ ye rūh-tā-rūh ik safar haiñ

sadāqat-e-asr bhī yahī haiñ karāhat-e-jabr bhī yahī haiñ

alāmat-e-dard bhī yahī haiñ karāmat-e-sabr bhī yahī haiñ

baġhair tafrīq-e-rañg-o-maz.hab zamīñ zamīñ in kī bādshāhī

khiñche hue haiñ lahū lahū meñ bichhe hue haiñ zabāñ zabāñ par

ye jhuuT bhī haiñ ye luuT bhī haiñ ye jañg bhī haiñ ye ḳhuun bhī haiñ

magar ye majbūriyāñ haiñ in kī

baġhair in ke hayāt saarī tavahhumātī

har ek harakat sukūt Thahre

na kah sakeñ kuchh na sun sakeñ kuchh

har ek ā.īna apnī akkāsiyoñ pe hairāñ ho aur chup ho

nigāh-e-nazzāra-bīñ tamāshā ho vahshatoñ kā

ijāzat-e-jalva de ke jaise zabāñ se goyā.ī chhīn lī jaa.e

na husn kuchh ho na ishq kuchh ho

tamām ehsās kī havā.eñ tamām irfān ke jazīre tamām ye ilm ke samundar

sarāb hoñ vahm hoñ gumāñ hoñ

ye lafz tesha haiñ jin se afkār apnī sūrat tarāshte haiñ

masīh-e-dast-o-qalam se nikleñ to phir ye alfāz bolte haiñ

yahī musavvir yahī haiñ but-gar yahī haiñ shā.er

yahī muġhannī yahī navā haiñ

yahī payambar yahī ḳhudā haiñ

maiñ kīmiyā huuñ ye kīmiyā-gar

ye merā kalyān chāhte haiñ

maiñ in kī tasḳhīr kar rahā huuñ

ye merī ta.amīr kar rahe haiñ

ye lafz suqraat lafz isa

main in ka KHaliq ye mere KHaliq

yahi azal hain yahi abad hain yahi zaman hain yahi makan hain

ye zehn-ta-zehn rah-guzar hain ye ruh-ta-ruh ek safar hain

sadaqat-e-asr bhi yahi hain karahat-e-jabr bhi yahi hain

alamat-e-dard bhi yahi hain karamat-e-sabr bhi yahi hain

baghair tafriq-e-rang-o-mazhab zamin zamin in ki baadshahi

khinche hue hain lahu lahu mein bichhe hue hain zaban zaban par

ye jhuT bhi hain ye luT bhi hain ye jang bhi hain ye KHun bhi hain

magar ye majburiyan hain in ki

baghair in ke hayat sari tawahhumati

har ek harakat sukut Thahre

na kah saken kuchh na sun saken kuchh

har ek aaina apni akkasiyon pe hairan ho aur chup ho

nigah-e-nazzara-bin tamasha ho wahshaton ka

ijazat-e-jalwa de ke jaise zaban se goyai chhin li jae

na husn kuchh ho na ishq kuchh ho

tamam ehsas ki hawaen tamam irfan ke jazire tamam ye ilm ke samundar

sarab hon wahm hon guman hon

ye lafz tesha hain jin se afkar apni surat tarashte hain

masih-e-dast-o-qalam se niklen to phir ye alfaz bolte hain

yahi musawwir yahi hain but-gar yahi hain shaer

yahi mughanni yahi nawa hain

yahi payambar yahi KHuda hain

main kimiya hun ye kimiya-gar

ye mera kalyan chahte hain

main in ki tasKHir kar raha hun

ye meri tamir kar rahe hain