ali-mohsin MBA, Khaalid-bin-walid road

ali-mohsin ke māmūñ luT ke ambāla se jab lahore aa.e the

kalām-e-pāk alam aur sajda-gāheñ saath laa.e the

chunāñche un ke ghar meñ mustaqil duldul bhī paltā thā

hamesha nau mohrram ko alam ghar se nikaltā thā

har āshūre ali-mohsin baḌe māmūñ ke ghar lahore hotā thā

vahīñ do chaar din ruk kar karachi jab vo aatā thā

to beDin road ke amritsarī halvā.ī se ammī aur abbā ke liye

laDDū bhī laatā thā

ali-mohsin ke abbā-jī baḌe hī pāk-tīnat the

magar un ke pakhoḌoñ aur kamar par mustaqil ḳhārish sī rahtī thī

ali-mohsin kī ammī kīna-parvar thiiñ

magar beTā to beTā thā

so kahtī thiiñ bahū jab ghar meñ lā.ūñgī

phaTeñgī tab tirī āñhkeñ

chaḌhāvā jab chaḌhā.ūñgī

vo is par kuchh na kahtā thā

vo un donoñ se vaise baat yuuñ bhī

kam hī kartā thā

vo ammī aur māmūñ ke liye lahore to jāatā

magar dīñ-dār logoñ se

use raġhbat na hotī thī

aur un se bahs karne kī

kabhī himmat na hotī thī

ali-mohsin ke tīnoñ yaar umar, parkāsh aur safdar

baḌe hī bad-aqīda the

vo chāroñ saath jab parkāsh ke us flat meñ hote

kilifTan meñ jahāñ vo shyām, rabarT aur nazar ke saath rahtā thā

baḌe hī kaif meñ hote

vo saare mil ke jab phir biich baraurī kī chunīda lemuñ vaalī uuDkā

ke jaam bharte the

to apnī shaam ko ḳhush-gappiyoñ bad-feliyoñ ke naam karte the

umar, parkāsh, safdar aur ali-mohsin kā daftar ek hī thā

is liye vo piite piite mā.era ko yaad karte the

ka.ī sāloñ se vo bhī saath thī un ke

vo hafte bhar meñ har din ik na.ī ḳhushbū lagātī thī

baḌe dāñtoñ jhuke kāñdhoñ kī laḌkī

jis kī sab bāteñ nirālī thiiñ

aur āñhkeñ kitnī kaalī thiiñ

ali-mohsin kī āñhkeñ to nahī bāteñ nihāyat ḳhūbsūrat thiiñ

vo yāroñ ko batātā thā

ki vo daftar meñ aa.ī sab na.ī intarnz ke chakkar meñ rahtā hai

jo thoḌe din ko aatī thiiñ

qamīseñ jin kī ūñchī thiiñ

yā jin ke chaak nīche the

jo bichve aur pāzebeñ pahantī thiiñ

jo ḳhush hoñ yā na hoñ

ḳhush-hāl lagtī thiiñ

vo bātoñ kī anī se jab kisī intern ke dil meñ

bahut se nit-na.e aur pur-masarrat ḳhvāb botā thā

use ḳhud bhī zarā dhīmā sā aur maġhlūb sā ik ishq hotā thā

vo apne kaam meñ bhī musta.id thā

company ne us ko gaaḌī dī thī jis meñ dek lagā thā

aur kisī intern ko le kar vo us par ghūmtā rahtā

paThāne-ḳhān ko suntā musalsal jhūmtā rahtā

ali-mohsin police ke rokne ke vaqt se pahle

kaḌāhī khā ke aur yāroñ se ruḳhsat le ke apne ghar pahuñchtā thā

pahuñchte hī vo T.v par kisī channel se aatī

inDian picture lagātā thā

magar phir bhuul kar sab

māyera kī ḳhushbuoñ meñ Duub jāatā thā

ali-mohsin ke mamun luT ke ambaala se jab lahore aae the

kalam-e-pak alam aur sajda-gahen sath lae the

chunanche un ke ghar mein mustaqil duldul bhi palta tha

hamesha nau mohrram ko alam ghar se nikalta tha

har aashure ali-mohsin baDe mamun ke ghar lahore hota tha

wahin do chaar din ruk kar karachi jab wo aata tha

to beDin road ke amritsari halwai se ammi aur abba ke liye

laDDu bhi lata tha

ali-mohsin ke abba-ji baDe hi pak-tinat the

magar un ke pakhoDon aur kamar par mustaqil KHarish si rahti thi

ali-mohsin ki ammi kina-parwar thin

magar beTa to beTa tha

so kahti thin bahu jab ghar mein laungi

phaTengi tab teri aanhken

chaDhawa jab chaDhaungi

wo is par kuchh na kahta tha

wo un donon se waise baat yun bhi

kam hi karta tha

wo ammi aur mamun ke liye lahore to jaata

magar din-dar logon se

use raghbat na hoti thi

aur un se bahs karne ki

kabhi himmat na hoti thi

ali-mohsin ke tinon yar umar, parkash aur safdar

baDe hi bad-aqida the

wo chaaron sath jab parkash ke us flat mein hote

kilifTan mein jahan wo shyam, rabarT aur nazar ke sath rahta tha

baDe hi kaif mein hote

wo sare mil ke jab phir bich barauri ki chunida lemun wali uDka

ke jam bharte the

to apni sham ko KHush-gappiyon bad-feliyon ke nam karte the

umar, parkash, safdar aur ali-mohsin ka daftar ek hi tha

is liye wo pite pite maera ko yaad karte the

kai salon se wo bhi sath thi un ke

wo hafte bhar mein har din ek nai KHushbu lagati thi

baDe danton jhuke kandhon ki laDki

jis ki sab baaten nirali thin

aur aanhken kitni kali thin

ali-mohsin ki aanhken to nahi baaten nihayat KHubsurat thin

wo yaron ko batata tha

ki wo daftar mein aai sab nai intarnz ke chakkar mein rahta hai

jo thoDe din ko aati thin

qamisen jin ki unchi thin

ya jin ke chaak niche the

jo bichwe aur pazeben pahanti thin

jo KHush hon ya na hon

KHush-haal lagti thin

wo baaton ki ani se jab kisi intern ke dil mein

bahut se nit-nae aur pur-masarrat KHwab bota tha

use KHud bhi zara dhima sa aur maghlub sa ek ishq hota tha

wo apne kaam mein bhi mustaid tha

company ne us ko gaDi di thi jis mein dek laga tha

aur kisi intern ko le kar wo us par ghumta rahta

paThane-KHan ko sunta musalsal jhumta rahta

ali-mohsin police ke rokne ke waqt se pahle

kaDahi kha ke aur yaron se ruKHsat le ke apne ghar pahunchta tha

pahunchte hi wo Tw par kisi channel se aati

inDian picture lagata tha

magar phir bhul kar sab

mayera ki KHushbuon mein Dub jaata tha