alkubDe

ye sat-māhe

maañ ke ḳhālī peT ke vīrāne meñ karāhe

nañgoñ, bhūkoñ, bhik-mangoñ ne

apnī sadā suhāgan line aur baḌhā dī

vo e.azāz diyā

ek jagah mustaqil banā dī

un kī ḳhamīda pusht

apne kohān se

muḌī kamān thī

jis kī bad-sūrat parchhā.īñ

ḳhatt-e-falak par daaġh kāḌhtī thī

niile rañg afsurda lagte the

un ke baap purāne ghaag

baḌe jalālī bhik-mange the

saare kāsa-lesoñ par

kuchh aisī dhāk....!

vo un kī āvāz suneñ

to rasta chhoḌ deñ

aur gale meñ aisī taan.....!

jo pankaj kī kharaj bhulā de

(ajab zamāna thā

jo europe ke gulzāroñ meñ

akhve phūTte the

tab bañgāl ke aur punjab ke

lash lash karte khetoñ meñ

dhaan aur gandum ke ḳhoshe

murjhāne lagte the)

is pas-e-manzar meñ

baap kī mustaqbil-andeshī ne

tiin baras kī lunj-munj sī

chiiz ke donoñ haat

chaT chaT toḌ ke

ek ek kuhnī aur banā dī thī

chār-dāñg meñ shohrat phail ga.ī

''pardā....

....pardā

chaar kuhniyoñ vaale

rām-charan alkubḌe aate haiñ''

is āvāz ne

itne itvāroñ kī ḳhāmoshī toḌī thī

jin kā hisāb nahīñ

ye kachhve kī

ulTī piiTh aisī

taḳhtī kī kashtī meñ

pairoñ ke patvār chalāte

humak humak andar aate

aur chiqoñ ke paas pahuñch kar

taam chīnī bartanoñ se

chapar chapar khāne khāte

aur daadī jaan ke saa.e se

sahj sahj bāteñ karte jaate the

sola saal yahī ma.amūl rahā

dildārī aur shikam-purī kā yahī usuul rahā

ek shaam abhāgan aa.ī

ye nahīñ aa.e

koī sītlā Daa.in aa.ī

ye nahīñ aa.e

baḌī DhuñDayyā paḌī

udāsī phail ga.ī

ammī jaan aur daadī jaan ne

paise bhej ke

jalvāne kā band-o-bast kiyā

to jal kar bhasm hue

par un kī muqaddas raakh aaj bhī

merī ruuh meñ uḌtī hai

''pardā....

....pardā

chaar kuhniyoñ vaale

rām-charan alkubḌe aate haiñ''

ye sat-mahe

man ke KHali peT ke virane mein karahe

nangon, bhukon, bhik-mangon ne

apni sada suhagan line aur baDha di

wo eazaz diya

ek jagah mustaqil bana di

un ki KHamida pusht

apne kohan se

muDi kaman thi

jis ki bad-surat parchhain

KHatt-e-falak par dagh kaDhti thi

nile rang afsurda lagte the

un ke bap purane ghag

baDe jalali bhik-mange the

sare kasa-leson par

kuchh aisi dhak!

wo un ki aawaz sunen

to rasta chhoD den

aur gale mein aisi tan!

jo pankaj ki kharaj bhula de

(ajab zamana tha

jo europe ke gulzaron mein

akhwe phuTte the

tab bangal ke aur punjab ke

lash lash karte kheton mein

dhan aur gandum ke KHoshe

murjhane lagte the)

is pas-e-manzar mein

bap ki mustaqbil-andeshi ne

tin baras ki lunj-munj si

chiz ke donon hat

chaT chaT toD ke

ek ek kuhni aur bana di thi

chaar-dang mein shohrat phail gai

parda

parda

chaar kuhniyon wale

ram-charan alkubDe aate hain

is aawaz ne

itne itwaron ki KHamoshi toDi thi

jin ka hisab nahin

ye kachhwe ki

ulTi piTh aisi

taKHti ki kashti mein

pairon ke patwar chalate

humak humak andar aate

aur chiqon ke pas pahunch kar

tam chini bartanon se

chapar chapar khane khate

aur dadi jaan ke sae se

sahj sahj baaten karte jate the

sola sal yahi mamul raha

dildari aur shikam-puri ka yahi usul raha

ek sham abhagan aai

ye nahin aae

koi sitla Dain aai

ye nahin aae

baDi DhunDayya paDi

udasi phail gai

ammi jaan aur dadi jaan ne

paise bhej ke

jalwane ka band-o-bast kiya

to jal kar bhasm hue

par un ki muqaddas rakh aaj bhi

meri ruh mein uDti hai

parda

parda

chaar kuhniyon wale

ram-charan alkubDe aate hain