America ke kutte

ham ne dekhe haiñ vo U-S ke nirāle kutte

kāTne vaale nahīñ bhūñkne vaale kutte

merī mahbūba-e-maġhrib ne bhī paale kutte

maiñ sambhālā na gayā us ne sambhāle kutte

silsile pyaar ke haivān se joḌe us ne

maiñ to insān huuñ kutte bhī na chhoḌe us ne

god meñ le liyā madam ne parāyā kuttā

kabhī chūmī kabhī ā.ankhoñ se lagāyā kuttā

baiThnā thā jahāñ shauhar ko biThāyā kuttā

aayā husband to kahne lagīñ aayā kuttā

is mudārāt pe shauhar ko bhī hirs aatī hai

apne hāthoñ se vo buldog ko nahlātī hai

har taraf kūcha-e-dildār meñ zam kutte haiñ

zulm koī bhī ho arbāb-e-sitam kutte haiñ

ham pe kahte haiñ imārat kā bharam kutte haiñ

aur kutte ye samajhte haiñ ki ham kutte haiñ

haath meñ le ke tab-o-tāb jahāñ-bānoñ kī

rassiyāñ khīñchte rahte haiñ ye insānoñ kī

haa.e vo kuttā-shanāsoñ kī siyāsī chāleñ

jo faqat apnī baqā ke liye kutte pāleñ

saath kutte ke vo burgar kabhī pizza khā leñ

aur hameñ dekhte hī aiD kī haDDī Dāleñ

ham se kahte haiñ zarā aur hilāo dum ko

dum hilāne kā salīqa nahīñ aatā tum ko

ek kutte ne kahā maiñ jo hasīñ rahtā huuñ

kyuuñ samajhte ho mujhe ḳhāk-nashīñ rahtā huuñ

jahāñ A-C kī sahūlat ho vahīñ rahtā huuñ

maiñ koī tīsrī duniyā meñ nahīñ rahtā huuñ

mujh ko khāne meñ jo ḳhūrāk yahāñ miltī hai

vo tire mulk ke logoñ ko kahāñ miltī hai

haiñ mire shahr ke kutte jo purāne vaale

vo haiñ panjoñ se mujhe zaḳhm lagāne vaale

Taañg alfāz-o-ma.ānī meñ uḌāne vaale

merī taḳhlīq ko dāñtoñ se chabāne vaale

har ishā.at pe mirī chauñkte rah jaate haiñ

maiñ guzar jaatā huuñ ye bhūñkte rah jaate haiñ

hum ne dekhe hain wo U-S ke nirale kutte

kaTne wale nahin bhunkne wale kutte

meri mahbuba-e-maghrib ne bhi pale kutte

main sambhaala na gaya us ne sambhaale kutte

silsile pyar ke haiwan se joDe us ne

main to insan hun kutte bhi na chhoDe us ne

god mein le liya madam ne paraya kutta

kabhi chumi kabhi aaankhon se lagaya kutta

baiThna tha jahan shauhar ko biThaya kutta

aaya husband to kahne lagin aaya kutta

is mudaraat pe shauhar ko bhi hirs aati hai

apne hathon se wo buldog ko nahlati hai

har taraf kucha-e-dildar mein zam kutte hain

zulm koi bhi ho arbab-e-sitam kutte hain

hum pe kahte hain imarat ka bharam kutte hain

aur kutte ye samajhte hain ki hum kutte hain

hath mein le ke tab-o-tab jahan-banon ki

rassiyan khinchte rahte hain ye insanon ki

hae wo kutta-shanason ki siyasi chaalen

jo faqat apni baqa ke liye kutte palen

sath kutte ke wo burgar kabhi pizza kha len

aur hamein dekhte hi aiD ki haDDi Dalen

hum se kahte hain zara aur hilao dum ko

dum hilane ka saliqa nahin aata tum ko

ek kutte ne kaha main jo hasin rahta hun

kyun samajhte ho mujhe KHak-nashin rahta hun

jahan A-C ki sahulat ho wahin rahta hun

main koi tisri duniya mein nahin rahta hun

mujh ko khane mein jo KHurak yahan milti hai

wo tere mulk ke logon ko kahan milti hai

hain mere shahr ke kutte jo purane wale

wo hain panjon se mujhe zaKHm lagane wale

Tang alfaz-o-maani mein uDane wale

meri taKHliq ko danton se chabane wale

har ishaat pe meri chaunkte rah jate hain

main guzar jata hun ye bhunkte rah jate hain