amir-e-shahr ki neki

purānī baat hai

lekin ye anhonī sī lagtī hai

amīr-e-shahr rātoñ ko

badal kar bhes

galiyoñ meñ phirā kartā

vo dīvāroñ pe likkhī

har na.ī tahrīr ko paḌhtā

sarā.e meñ har ik nau-vārid-e-shab se

safar kā mājrā suntā

gharoñ kī chimniyoñ ko dekh kar

andāza-e-nān-e-javīñ kartā

pareshāñ-hāliyoñ se bā-ḳhabar rahtā

mazāroñ maqbaroñ kī chaukhaToñ ko chūmtā

aur shab ga.e masjid meñ aatā

sub.h tak

yād-e-ilāhī meñ basar kartā

huā ik raat yuuñ

chāroñ taraf dariyā umaD aayā

koī jaagā nahīñ

tanhā

amīr-e-shahr ke baazū

fasīl-e-shahr kī buniyād ko thāme rahe shab bhar

badan kī Dhaal se

sailāb ko roke rahe shab bhar

sunā hai phir kabhī

dariyā kī tuġhyānī

fasīl-e-shahr ko Dhāne nahīñ aa.ī

amīr-e-shahr kī nekī

zamāne tak

ḳhatā-kāroñ ke kaam aa.ī

purani baat hai

lekin ye anhoni si lagti hai

amir-e-shahr raaton ko

badal kar bhes

galiyon mein phira karta

wo diwaron pe likkhi

har nai tahrir ko paDhta

sarae mein har ek nau-warid-e-shab se

safar ka majra sunta

gharon ki chimniyon ko dekh kar

andaza-e-nan-e-jawin karta

pareshan-haaliyon se ba-KHabar rahta

mazaron maqbaron ki chaukhaTon ko chumta

aur shab gae masjid mein aata

subh tak

yaad-e-ilahi mein basar karta

hua ek raat yun

chaaron taraf dariya umaD aaya

koi jaga nahin

tanha

amir-e-shahr ke bazu

fasil-e-shahr ki buniyaad ko thame rahe shab bhar

badan ki Dhaal se

sailab ko roke rahe shab bhar

suna hai phir kabhi

dariya ki tughyani

fasil-e-shahr ko Dhane nahin aai

amir-e-shahr ki neki

zamane tak

KHata-karon ke kaam aai