amrita-piritam

shiddat-e-dard-o-alam se jab bhī ghabrātā huuñ maiñ

tere naġhmoñ kī ghanī chhāñv meñ aa jaatā huuñ maiñ

zindagī kā aa.ina ye hai tire fan kā kamāl

hai udhar hadd-e-falak tak terī parvāz-e-ḳhayāl

chal gayā saare diloñ par terā sehr-e-sāmrī

jāvedāñ ai amritā-pirītam hai terī shā.irī

shiddat-e-ehsās ho to ḳhud sañvar jaatā hai fan

raushnī hotī hai kul duniyā meñ jab jaltā hai man

sar-phire kuchh ahl-e-fan maare hue taqdīr ke

yūñhī be-samjhī meñ haiñ dushman tirī tahrīr ke

dushmanoñ ke vaar se Dartī na ghabrātī hai tū

log patthar pheñkte haiñ phuul barsātī hai tū

tere fan ke mo'tarif hoñge vo vaqt aane ko hai

phuul tere fan kā har gulshan ko mahkāne ko hai

shiddat-e-dard-o-alam se jab bhi ghabraata hun main

tere naghmon ki ghani chhanw mein aa jata hun main

zindagi ka aaina ye hai tere fan ka kamal

hai udhar hadd-e-falak tak teri parwaz-e-KHayal

chal gaya sare dilon par tera sehr-e-samri

jawedan ai amrita-piritam hai teri shairi

shiddat-e-ehsas ho to KHud sanwar jata hai fan

raushni hoti hai kul duniya mein jab jalta hai man

sar-phire kuchh ahl-e-fan mare hue taqdir ke

yunhi be-samjhi mein hain dushman teri tahrir ke

dushmanon ke war se Darti na ghabraati hai tu

log patthar phenkte hain phul barsati hai tu

tere fan ke mo'tarif honge wo waqt aane ko hai

phul tere fan ka har gulshan ko mahkane ko hai