an-kahi

sāñvlī! to mire pahlū meñ hai

lekin tirī pyāsī āñkheñ

kabhī dīvār ko taktī haiñ

kabhī jānib-e-dar dekhtī haiñ

mujh se is tarah gurezāñ jaise

unheñ mujh se nahīñ dīvār se kuchh kahnā hai

yā ye panchhī haiñ jinheñ

ek hī parvāz meñ uḌ jaanā hai

haath nahīñ aanā hai

(ai mirī sāñvlī! in āñkhoñ ke donoñ panchhī

gar uḌe bhī to mire dil kī taraf ā.eñge)

sāñvlī! mujh ko tirī āñkhoñ ne

vo fasāne bhī sunā.e ki jinheñ

kahnā chāheñ to tire hoñT faqat ''jī'' kah kar

aur afsānoñ ko dohrāne lagīñ

yā tū begānoñ kī mānind mire paas se guzre

to kabhī

merī taraf dekh ke chalnā bhī gavārā na kare

lekin āñkhoñ meñ chamak aa jaa.e

maslahat hoñT to sī le magar in āñkhoñ ko

kaise ḳhāmosh rakhe kaise unheñ samjhā.e

baat kartī hai to āñkheñ nahīñ milne detī

sāñvlī Dartī hai dil nain jharokoñ meñ na aa.e

sanwli! to mere pahlu mein hai

lekin teri pyasi aankhen

kabhi diwar ko takti hain

kabhi jaanib-e-dar dekhti hain

mujh se is tarah gurezan jaise

unhen mujh se nahin diwar se kuchh kahna hai

ya ye panchhi hain jinhen

ek hi parwaz mein uD jaana hai

hath nahin aana hai

(ai meri sanwli! in aankhon ke donon panchhi

gar uDe bhi to mere dil ki taraf aaenge)

sanwli! mujh ko teri aankhon ne

wo fasane bhi sunae ki jinhen

kahna chahen to tere honT faqat ji kah kar

aur afsanon ko dohrane lagin

ya tu beganon ki manind mere pas se guzre

to kabhi

meri taraf dekh ke chalna bhi gawara na kare

lekin aankhon mein chamak aa jae

maslahat honT to si le magar in aankhon ko

kaise KHamosh rakhe kaise unhen samjhae

baat karti hai to aankhen nahin milne deti

sanwli Darti hai dil nain jharokon mein na aae