an-paDh gunge ka rajaz

ḳhāmoshī merā lashkar hai

lafzoñ kī daldal

aur us meñ palne vaalī joñkeñ

ye muta.affin āvāzeñ

merī yalġhār ke aage sābit-qadam raheñgī?

kyā tum vāqa.ī aisā samajhte ho

ki tumhāre maidān itne farāḳh haiñ

ki mere asp-e-asīl ko thakā deñge

tumhāre samundar itne mavvāj haiñ

ki merā rizq ulaT deñge

aur tumhāre pahāḌ itne sañglāḳh haiñ

ki merā jhanDā na thāmeñge

dushman ahmaq ho to merā ġhussa baḌhā detā hai

saqāhat merī muayyana maqtūl hai

aur ḳhush-fahmī muqarrara mazbūh

merī chiñghāḌ sūr-e-isrāfīl kā pesh-āhañg hai

lafz kī minmināhaT se paak

andhe sayyāroñ ke Takrāo kī māfauq-e-samā.at gaḌgaḌāhaT

āvāz kī mukammal minhā.ī kā shor

likhe hue lafz ko bhī shaq kar detā hai

ye ibārateñ tumhārā saf-basta lashkar haiñ

farzī hathiyāroñ se musallah ye lashkar

jise ḳhayālī qiloñ ke brij girāne kā baḌā tajraba hai

is kī nā-būdī merī ek chup ke fāsle par hai

yaad! rakhnā

mere paas koī rassī nahīñ hotī

jo tumhāre gale meñ Dālne aur

tumhāre haath bāñdhne ke kaam aa.e

merā fitrāk hamesha ḳhālī rahtā hai

aur mere qaid-ḳhāne kabhī ābād nahīñ rahe

maiñ jañg se pahle hī dushman shumār kar letā huuñ

phir maqtūlīn kī gintī nahīñ kartā

sab jānte haiñ

mujh par neza pheñkne vāloñ kī paspā.ī nā-tamām rahtī hai

merī haibat se zamīn maqnātīs bantī hai

aur havā kohrbā.ī kartī hai

merā shikār bijliyāñ hāñktī haiñ

maut merā tarkash uThā kar chaltī hai

aur merā rath āñdhiyāñ khīñchtī haiñ

lafzoñ ke maktūb jañgal itne ghane nahīñ haiñ

ki tumheñ aag kī bārish se tar-ba-tar na hone deñ

sarf-o-nahv kā sā.ebān itnā baḌā nahīñ hai

ki sitāra-e-ajal tum se ojhal rah jaa.e

kitāboñ se itnī ūñchī dīvār nahīñ bantī

ki qitāl sannāTā phalāñg na sake

kyā hasīn duniyā thī

jise tum ne lafzoñ se dāġhdār kar diyā

us ke tābinda āfāq

in pinjroñ meñ ghaT kar sāqitushshams ho ga.e haiñ

kaisī zinda zamīn thī

jis meñ tum ne zahr bo diyā

kaisā raushan āsmān thā

jise tum tārīkī ke mafhūm meñ sarf kar chuke ho

tum ne shu.ūr ko jhūTā

aur fitrat ko gadlā kar diyā hai

mahz zabān ke chaTḳhāre ke liye

tum ne vajūd kā asās-ul-bait

farhañgoñ ke mol bech khāyā

maiñ kā.enāt kī bāzyābī ke liye niklā huuñ

merā ḳhanjar lafz kā peT chaak karegā

ma.anī kī zambīl phaaḌ Dālegā

aur kazzāb ishāroñ ke haath qalam kar degā

jinhoñ ne sayyāroñ ko gumrāh kar rakhā hai

be-zabānoñ ko muzhda ho

haqīqat kā aslī tanāzur bahāl hone ko hai

tumhāre dushman fasīloñ ke tasavvur meñ mahsūr haiñ

siyāh ā.īne kī ye maḳhlūq

jis kī manhūs parchhā.īñ ne

har taraf shor machā rakkhā hai

ḳhud hī apnā madfan hai

merī āḳhirī yalġhār se ho jā.eñge saare manāzir

saarī āvāzeñ

āzād

nā-malfūz....

KHamoshi mera lashkar hai

lafzon ki daldal

aur us mein palne wali jonken

ye mutaffin aawazen

meri yalghaar ke aage sabit-qadam rahengi?

kya tum waqai aisa samajhte ho

ki tumhaare maidan itne faraKH hain

ki mere asp-e-asil ko thaka denge

tumhaare samundar itne mawwaj hain

ki mera rizq ulaT denge

aur tumhaare pahaD itne sanglaKH hain

ki mera jhanDa na thamenge

dushman ahmaq ho to mera ghussa baDha deta hai

saqahat meri muayyana maqtul hai

aur KHush-fahmi muqarrara mazbuh

meri chinghaD sur-e-israfil ka pesh-ahang hai

lafz ki minminahaT se pak

andhe sayyaron ke Takrao ki mafauq-e-samaat gaDgaDahaT

aawaz ki mukammal minhai ka shor

likhe hue lafz ko bhi shaq kar deta hai

ye ibaraten tumhaara saf-basta lashkar hain

farzi hathiyaron se musallah ye lashkar

jise KHayali qilon ke brij girane ka baDa tajraba hai

is ki na-budi meri ek chup ke fasle par hai

yaad! rakhna

mere pas koi rassi nahin hoti

jo tumhaare gale mein Dalne aur

tumhaare hath bandhne ke kaam aae

mera fitrak hamesha KHali rahta hai

aur mere qaid-KHane kabhi aabaad nahin rahe

main jang se pahle hi dushman shumar kar leta hun

phir maqtulin ki ginti nahin karta

sab jaante hain

mujh par neza phenkne walon ki paspai na-tamam rahti hai

meri haibat se zamin maqnatis banti hai

aur hawa kohrbai karti hai

mera shikar bijliyan hankti hain

maut mera tarkash uTha kar chalti hai

aur mera rath aandhiyan khinchti hain

lafzon ke maktub jangal itne ghane nahin hain

ki tumhein aag ki barish se tar-ba-tar na hone den

sarf-o-nahw ka saeban itna baDa nahin hai

ki sitara-e-ajal tum se ojhal rah jae

kitabon se itni unchi diwar nahin banti

ki qital sannaTa phalang na sake

kya hasin duniya thi

jise tum ne lafzon se daghdar kar diya

us ke tabinda aafaq

in pinjron mein ghaT kar saqitushshams ho gae hain

kaisi zinda zamin thi

jis mein tum ne zahr bo diya

kaisa raushan aasman tha

jise tum tariki ke mafhum mein sarf kar chuke ho

tum ne shuur ko jhuTa

aur fitrat ko gadla kar diya hai

mahz zaban ke chaTKHare ke liye

tum ne wajud ka asas-ul-bait

farhangon ke mol bech khaya

main kaenat ki bazyabi ke liye nikla hun

mera KHanjar lafz ka peT chaak karega

mani ki zambil phaD Dalega

aur kazzab ishaaron ke hath qalam kar dega

jinhon ne sayyaron ko gumrah kar rakha hai

be-zabanon ko muzhda ho

haqiqat ka asli tanazur bahaal hone ko hai

tumhaare dushman fasilon ke tasawwur mein mahsur hain

siyah aaine ki ye maKHluq

jis ki manhus parchhain ne

har taraf shor macha rakkha hai

KHud hi apna madfan hai

meri aaKHiri yalghaar se ho jaenge sare manazir

sari aawazen

aazad

na-malfuz