andesha-e-jaan

kis liye kahāñ se kyā huā ki maiñ yahāñ aa pahuñchā

ab mujhe kaise le jaayā jā.egā

vahāñ jahāñ mohabbat thī

anurāg thā

aur us kā raaj thā

āvāz ke ḳhudā

ab tū hī batā ki afsos kis par kiyā jaa.e

aur kis ko duhā.ī dī jaa.e

kis ne mujhe is tarah maar diyā

ki na to maiñ apnī nazar meñ rahā

na duniyā merī nazar meñ

uThāo use vahāñ se

jahāñ uThne se pahle thā hī nahīñ

kyā jānūñ maiñ ki tū hī vasundrā hai

bachā lo mere ḳhudā

ki maiñ uḌne se pahle hī uḌ rahā huuñ

us taraf jahāñ

dhartī hai na ākāsh hai

sivā.e dukh ke aur is kī talchhaT ke

ab maiñ kis se pūchhūñ ki mujhe kis ne maarā

shā.irī kā din to kabhī huā nahīñ

magar ye raat kyuuñ ho rahī hai

raat ko bachā lo varna din use maar degā

nā-dīda chāñdnī se kaho ki vo apnā chāñd DhūñDh kar laa.e

varna maiñ use ḳhudā ke supurd kar dūñgā

aur kahūñgā ki ā.inda niiñd kabhī paidā na kiyā jaa.e

ghar ghar

damak rahī hai chāñdnī

kyūñki us kā ḳhudā use damkāne ke liye aa gayā hai

kis liye kahan se kya hua ki main yahan aa pahuncha

ab mujhe kaise le jaya jaega

wahan jahan mohabbat thi

anurag tha

aur us ka raj tha

aawaz ke KHuda

ab tu hi bata ki afsos kis par kiya jae

aur kis ko duhai di jae

kis ne mujhe is tarah mar diya

ki na to main apni nazar mein raha

na duniya meri nazar mein

uThao use wahan se

jahan uThne se pahle tha hi nahin

kya jaanun main ki tu hi wasundra hai

bacha lo mere KHuda

ki main uDne se pahle hi uD raha hun

us taraf jahan

dharti hai na aakash hai

siwae dukh ke aur is ki talchhaT ke

ab main kis se puchhun ki mujhe kis ne mara

shairi ka din to kabhi hua nahin

magar ye raat kyun ho rahi hai

raat ko bacha lo warna din use mar dega

na-dida chandni se kaho ki wo apna chand DhunDh kar lae

warna main use KHuda ke supurd kar dunga

aur kahunga ki aainda nind kabhi paida na kiya jae

ghar ghar

damak rahi hai chandni

kyunki us ka KHuda use damkane ke liye aa gaya hai