andesha

sandalīñ jism kī ḳhushbū se mahaktī huī raat

mujh se kahtī hai yahīñ aaj baserā kar le

gar tirī niiñd ujāloñ kī parastār nahīñ

apne ehsās pe zulfoñ kā añdherā kar le

maiñ ki din bhar kī chakā-chauñd se uktāyā huā

kisī ġhunche kī tarah dhuup meñ kumhlāyā huā

ik na.ī chhāñv meñ sustāne ko aa baiThā huuñ

gardish-e-dahr ke ālām se ghabrāyā huā

sochtā huuñ ki yahīñ aaj baserā kar luuñ

sub.h ke saath kaḌī dhuup khaḌī hai sar par

kyuuñ na is abr ko kuchh aur ghanerā kar luuñ

jaane ye raat akele meñ kaTe yā na kaTe

kyuuñ na kuchh der shabistāñ meñ añdherā kar luuñ

lekin is raat kī ye baat na baḌh jaa.e kahīñ

tujh se mil kar ye mire dil ko lagā hai dhaḌkā

raakh ho jā.ūñgā maiñ sub.h se pahle pahle

khul ke siine meñ jo ehsās kā sho.ala bhaḌkā

sandalin jism ki KHushbu se mahakti hui raat

mujh se kahti hai yahin aaj basera kar le

gar teri nind ujalon ki parastar nahin

apne ehsas pe zulfon ka andhera kar le

main ki din bhar ki chaka-chaund se uktaya hua

kisi ghunche ki tarah dhup mein kumhlaya hua

ek nai chhanw mein sustane ko aa baiTha hun

gardish-e-dahr ke aalam se ghabraya hua

sochta hun ki yahin aaj basera kar lun

subh ke sath kaDi dhup khaDi hai sar par

kyun na is abr ko kuchh aur ghanera kar lun

jaane ye raat akele mein kaTe ya na kaTe

kyun na kuchh der shabistan mein andhera kar lun

lekin is raat ki ye baat na baDh jae kahin

tujh se mil kar ye mere dil ko laga hai dhaDka

rakh ho jaunga main subh se pahle pahle

khul ke sine mein jo ehsas ka shoala bhaDka