andhere mein sochne ki mashq

añdherā thā

añdherā lāl-qil.a jis meñ ik kaalā hayūlā thā

hazāroñ qumqumoñ kī raushnī thī dā.era-dar-dā.era phir bhī

añdherā thā

nigal Daalā thā jis ne laal qil.e ko ghanā gāḌhā añdherā thā

hazāroñ qumqumoñ kī raushnī meñ paas kī chīzeñ hī pas-manzar

añdherā jin kā pas-e-manzar

saḌak par har saḌak par raushnī kī dauḌ jaarī thī

añdhere meñ ġhubār-o-gard ke uḌte hue zarroñ ko raushan kar rahe the

baham munqate karte raushnī ke dā.ere

añdherā kaTtī-phaTtī dauḌtī uḌtī bikhartī raushnī ko pī rahā thā

añdhere kā magarmachh

añdhere ke samundar meñ

ujāle kī chamaktī machhliyoñ ko apne dāñtoñ meñ dabā.e tairtā thā

añdhere kā magarmachh lāl-qil.e par

baḌī zahrīlī sāñseñ chhoḌtā thā

nazar aatā nahīñ thā lāl-qil.a

ki is ke burj kañgūre dar-o-dīvār ik kaalā hayūlā ban ga.e the

hayūlā ban gayā thā lāl-qil.a

magar us ke vahāñ hone meñ koī shak nahīñ thā

añdherā thā

añdhere ke samundar kī guphā meñ lāl-qil.a thā

andhera tha

andhera lal-qila jis mein ek kala hayula tha

hazaron qumqumon ki raushni thi daera-dar-daera phir bhi

andhera tha

nigal Dala tha jis ne lal qile ko ghana gaDha andhera tha

hazaron qumqumon ki raushni mein pas ki chizen hi pas-manzar

andhera jin ka pas-e-manzar

saDak par har saDak par raushni ki dauD jari thi

andhere mein ghubar-o-gard ke uDte hue zarron ko raushan kar rahe the

baham munqate karte raushni ke daere

andhera kaTti-phaTti dauDti uDti bikharti raushni ko pi raha tha

andhere ka magarmachh

andhere ke samundar mein

ujale ki chamakti machhliyon ko apne danton mein dabae tairta tha

andhere ka magarmachh lal-qile par

baDi zahrili sansen chhoDta tha

nazar aata nahin tha lal-qila

ki is ke burj kangure dar-o-diwar ek kala hayula ban gae the

hayula ban gaya tha lal-qila

magar us ke wahan hone mein koi shak nahin tha

andhera tha

andhere ke samundar ki gupha mein lal-qila tha