andheron ke pujari

añdheroñ ke pujārī ko ujāloñ se ho kyoñ raġhbat

sub.h kī narm kirnoñ se ho in ko kis liye chāhat

inheñ to diip jugnū aur sitāroñ se bhī nafrat hai

inheñ to raushnī detī kitāboñ se adāvat hai

gavāra hai inheñ bas chāñd bhī to avvalīñ shab kā

vagarna taaq aur ghanghor rātoñ meñ

talāsh-e-rab rahe jaarī

magar ye kyā zabāñ par kalma-e-haq aur āñkhoñ meñ

ajab vahshat ajab dahshat lahū taarī lahū taarī

musāvāt-e-tashaḳhḳhus kyā uḳhuvvat bhā.ī-chāra kyā

lahū ko chāTte ḳhanjar se un ko aur pyārā kyā

mohabbat un ke aage bas gunah hai jo kabīra hai

shahar pe raaj kartī vahshateñ un kā vatīra hai

magar vo bhuul baiThe haiñ usūl-e-zindagī hai ki

fazā meñ lahlahātī aag ko taaza havā.eñ sard kartī haiñ

ho kaalī raat jitnī bhī sub.h-e-sādiq kā sūraj

siyāhī kī riyāsat par nazar jab gaaḌ detā hai

to phir

saverā jagmagātā hai ḳhudā bhī muskurātā hai

añdheroñ ke pujārī jaan leñ itnā

havā na qaid hotī hai na sūraj dafn hotā hai

andheron ke pujari ko ujalon se ho kyon raghbat

subh ki narm kirnon se ho in ko kis liye chahat

inhen to dip jugnu aur sitaron se bhi nafrat hai

inhen to raushni deti kitabon se adawat hai

gawara hai inhen bas chand bhi to awwalin shab ka

wagarna taq aur ghanghor raaton mein

talash-e-rab rahe jari

magar ye kya zaban par kalma-e-haq aur aankhon mein

ajab wahshat ajab dahshat lahu tari lahu tari

musawat-e-tashaKHKHus kya uKHuwwat bhai-chaara kya

lahu ko chaTte KHanjar se un ko aur pyara kya

mohabbat un ke aage bas gunah hai jo kabira hai

shahar pe raj karti wahshaten un ka watira hai

magar wo bhul baiThe hain usul-e-zindagi hai ki

faza mein lahlahati aag ko taza hawaen sard karti hain

ho kali raat jitni bhi subh-e-sadiq ka suraj

siyahi ki riyasat par nazar jab gaD deta hai

to phir

sawera jagmagata hai KHuda bhi muskuraata hai

andheron ke pujari jaan len itna

hawa na qaid hoti hai na suraj dafn hota hai