apne bachche ke nam

ai mire sinn-o-sāl ke hāsil

mere āñgan ke nau-damīda gulāb

mere ma.asūm ḳhvāb ke ham-shakl

merī maryam ke sāya-e-shādāb

sub.h-e-taḳhlīq kā salām tujhe

zindagī tujh ko kahtī hai ādāb

ai muqaddas zamīñ ke sho.ala-e-nau

tū farozāñ ho un fazāoñ meñ

mere siine kī jo amānat haiñ

jo mirī nā-rasā duāoñ meñ

is tarah muskurātī hai jaise

naġhmagī duur kī sadāoñ meñ

mujh ko ajdād se virāsat meñ

vo ḳharābe mile ki jin meñ rahā

umr bhar pā.emāl o ḳhāk-basar

merā hissa rahā ġham-e-fardā

mujh ko mere lahū meñ nahlā kar

jis ne qaid-e-hayāt meñ rakkhā

ai mirī rūh-e-fan ke aks-e-jamīl

tujh ko merī sī zindagī na mile

jo na maiñ ho sakā vo to ho jaa.e

kaash tū merā jā-nashīñ na bane

maiñ tasavvur meñ bhī jahāñ na gayā

un dayāroñ meñ terā naam chale

ai mere sinn-o-sal ke hasil

mere aangan ke nau-damida gulab

mere masum KHwab ke ham-shakl

meri maryam ke saya-e-shadab

subh-e-taKHliq ka salam tujhe

zindagi tujh ko kahti hai aadab

ai muqaddas zamin ke shoala-e-nau

tu farozan ho un fazaon mein

mere sine ki jo amanat hain

jo meri na-rasa duaon mein

is tarah muskuraati hai jaise

naghmagi dur ki sadaon mein

mujh ko ajdad se wirasat mein

wo KHarabe mile ki jin mein raha

umr bhar paemal o KHak-basar

mera hissa raha gham-e-farda

mujh ko mere lahu mein nahla kar

jis ne qaid-e-hayat mein rakkha

ai meri ruh-e-fan ke aks-e-jamil

tujh ko meri si zindagi na mile

jo na main ho saka wo to ho jae

kash tu mera ja-nashin na bane

main tasawwur mein bhi jahan na gaya

un dayaron mein tera nam chale