apne jaise aashiqon ke nam

maiñ taḌaptā huuñ

maiñ bahut taḌaptā huuñ

ki vahāñ lauT jā.ūñ jahāñ se merī umr shurūa huī thī

jahāñ mere din raat merī miTTī kī mahak se mahakte the

zamīn bhar kī dhuup meñ se mere hisse kī dhuup

mere rome rome ko señktī thī

sitāroñ bhare āsmān meñ se mere naam kā sitāra

badan kī agnī ban ke mere hisse kī dulhan ko

nadī ke paanī se banī huī sej pe utārtā thā

aur an-dekhī tah meñ tairtī machhliyoñ kī saañs ko sañgīt kar detā thā

raat meñ chhupe hue din ko

aur din meñ chhupī huī raat ko

ek dūsre ke paas lā ke ḳhud kahīñ chhup jaatā thā

phir jhaag se jhaag nikaltā thā

aur jhaag se an-ginat mūrtiyāñ bantī thiiñ

tab unheñ pūjne kī tijārat ījād nahīñ huī thī

tab aag harī ghaas ko nahīñ jalātī thī

sivā.e is ke ki paañv par reñgtī huī chyūñTī haath kī pakaḌ meñ aa jaatī thī

kā.enāt bhar kī bhuuk aur pyaas kī

sīñchā.ī karte hue kisān aur khudā.ī karte hue mazdūr

abhī khet aur fasl aur kachche pakke ghar aur dīvāroñ aur jīvan maran

aur shamshān bhuum aur qabroñ se pahchāne to jaate the

abhī bāzāroñ meñ ghūmte phirte nañge pāgaloñ

aur un ke hisse kī gāliyoñ aur pattharoñ kī pahchān se zindagī kī pahchān to hotī thī

abhī raat ke safar meñ kisī an-dekhe jahān se

merī duniyā ke jañgaloñ meñ utarte jugnuoñ ke jhunD chahak chahak ke

sudhārī huī rūhoñ kā atā patā batāte the

afsos ab maiñ vahāñ lauTnā chāhūñ bhī

to ḳhud par itnā guzar chukā huuñ ki lauT nahīñ saktā

main taDapta hun

main bahut taDapta hun

ki wahan lauT jaun jahan se meri umr shurua hui thi

jahan mere din raat meri miTTi ki mahak se mahakte the

zamin bhar ki dhup mein se mere hisse ki dhup

mere rome rome ko senkti thi

sitaron bhare aasman mein se mere nam ka sitara

badan ki agni ban ke mere hisse ki dulhan ko

nadi ke pani se bani hui sej pe utarta tha

aur an-dekhi tah mein tairti machhliyon ki sans ko sangit kar deta tha

raat mein chhupe hue din ko

aur din mein chhupi hui raat ko

ek dusre ke pas la ke KHud kahin chhup jata tha

phir jhag se jhag nikalta tha

aur jhag se an-ginat murtiyan banti thin

tab unhen pujne ki tijarat ijad nahin hui thi

tab aag hari ghas ko nahin jalati thi

siwae is ke ki panw par rengti hui chyunTi hath ki pakaD mein aa jati thi

kaenat bhar ki bhuk aur pyas ki

sinchai karte hue kisan aur khudai karte hue mazdur

abhi khet aur fasl aur kachche pakke ghar aur diwaron aur jiwan maran

aur shamshan bhum aur qabron se pahchane to jate the

abhi bazaron mein ghumte phirte nange pagalon

aur un ke hisse ki galiyon aur pattharon ki pahchan se zindagi ki pahchan to hoti thi

abhi raat ke safar mein kisi an-dekhe jahan se

meri duniya ke jangalon mein utarte jugnuon ke jhunD chahak chahak ke

sudhaari hui ruhon ka ata pata batate the

afsos ab main wahan lauTna chahun bhi

to KHud par itna guzar chuka hun ki lauT nahin sakta