april bahaar ka istiqbaal karta hai

faroġh-e-shādābī-e-chaman ko mahaktī miTTī se phuuT niklā hai narm sabza

harīs-e-taḳhlīq nam zamīñ ne guloñ se dāman udaas beloñ ke bhar diye haiñ

ajiib rut hai! ki būḌhī shāḳhoñ meñ saañs letā hai sabz jauban

ḳhayāloñ, ḳhvāboñ kī rahguzar par chaTak rahī haiñ hazār kaliyāñ

nigāh-e-dil ke gazīda goshe rahīn-e-nik.hat

fazā kī poroñ meñ jaag uTThī hai bhīnī ḳhushbū, havā ke hāthoñ meñ raushnī ke jaḌāv kañgan

havā ke pairoñ meñ raqs karne lage haiñ ghuñgrū

parinde rañgīn shaam oḌhe shafaq kī surḳhī se khelte haiñ

damakte paanī meñ ġhusl karte haiñ chāñd taare

nahātī kaliyoñ kī be-libāsī ko kitnī hairat se dekhtā hai

nafīs pattoñ kī shaal oḌhe ghanerā jañgal

gulāb ke surḳh pairahan par, safed phūloñ kī pattiyoñ par!

samā.at-e-shab meñ sabt kartī hai os yuuñ jal-tarañg naġhme

ki giit vo jo azal se be-kal fazā meñ gum the

utarne lagte haiñ dhaḌkanoñ kī hasīn lai par, mohabbatoñ ke amiin ban kar

milan kī aisī sabīh rut meñ husn detā aap dastak

tumhāre dar par...

farogh-e-shadabi-e-chaman ko mahakti miTTi se phuT nikla hai narm sabza

haris-e-taKHliq nam zamin ne gulon se daman udas belon ke bhar diye hain

ajib rut hai! ki buDhi shaKHon mein sans leta hai sabz jauban

KHayalon, KHwabon ki rahguzar par chaTak rahi hain hazar kaliyan

nigah-e-dil ke gazida goshe rahin-e-nikhat

faza ki poron mein jag uTThi hai bhini KHushbu, hawa ke hathon mein raushni ke jaDaw kangan

hawa ke pairon mein raqs karne lage hain ghungru

parinde rangin sham oDhe shafaq ki surKHi se khelte hain

damakte pani mein ghusl karte hain chand tare

nahati kaliyon ki be-libasi ko kitni hairat se dekhta hai

nafis patton ki shaal oDhe ghanera jangal

gulab ke surKH pairahan par, safed phulon ki pattiyon par!

samaat-e-shab mein sabt karti hai os yun jal-tarang naghme

ki git wo jo azal se be-kal faza mein gum the

utarne lagte hain dhaDkanon ki hasin lai par, mohabbaton ke amin ban kar

milan ki aisi sabih rut mein husn deta aap dastak

tumhaare dar par