aql-mand masKHara

masḳhara thā bādshah kā ik ġhulām

ho gayā thā vo bahut hī nek-nām

ḳhidmat-e-maḳhlūq us kā kaam thā

aur is nekī kā charchā aam thā

dekhiye karnā ḳhudā kā kyā huā

ek us kā dost ġham meñ phañs gayā

rang laa.ī shaah kī chashm-e-itāb

be-navā par ho gayā nāzil azaab

mil chukā thā hukm us ko qatl kā

ab rihā.ī kā koī chāra na thā

maut kī saa.at nazar aa.ī qarīb

masḳhare ke paas pahuñchā vo ġharīb

kah sunāyā us ko apnā mājrā

shaah vālā-jāh hai mujh se ḳhafā

phir sifārish ke liye vo masḳhara

jald-tar darbār-e-shāhī meñ gayā

bādshāh ne masḳhare ko dekh kar

kī baḌe ġhusse se us par bhī nazar

phir kahā terī na mānūñgā kabhī

talḳh kar rakhī hai tū ne zindagī

har kisī kā tū banā hai ġham-gusār

phir sifārish kā ho kyoñ kar e'tibār

maiñ karūñgā tere kahne ke ḳhilāf

kar nahīñ saktā qusūr is kā muaaf

masḳhare ne arz kī ālam-panāh

qaul se phirte nahīñ haiñ bādshāh

qatl ho jaa.e ye bad-qismat shitāb

kījiye dil khol kar is par itaab

ye itāb-e-shāh jald hī duur ho

aur dil sarkār kā masrūr ho

bādshah ko aa ga.ī is par hañsī

paa.ī mujrim ne dobāra zindagī

masḳhare kī aql par sab shaad the

ġham-zada dil aish se ābād the

bach ga.ī ik jaan us kī baat se

ho gayā bekas rihā āfāt se

masKHara tha baadshah ka ek ghulam

ho gaya tha wo bahut hi nek-nam

KHidmat-e-maKHluq us ka kaam tha

aur is neki ka charcha aam tha

dekhiye karna KHuda ka kya hua

ek us ka dost gham mein phans gaya

rang lai shah ki chashm-e-itab

be-nawa par ho gaya nazil azab

mil chuka tha hukm us ko qatl ka

ab rihai ka koi chaara na tha

maut ki saat nazar aai qarib

masKHare ke pas pahuncha wo gharib

kah sunaya us ko apna majra

shah wala-jah hai mujh se KHafa

phir sifarish ke liye wo masKHara

jald-tar darbar-e-shahi mein gaya

baadshah ne masKHare ko dekh kar

ki baDe ghusse se us par bhi nazar

phir kaha teri na manunga kabhi

talKH kar rakhi hai tu ne zindagi

har kisi ka tu bana hai gham-gusar

phir sifarish ka ho kyon kar e'tibar

main karunga tere kahne ke KHilaf

kar nahin sakta qusur is ka muaf

masKHare ne arz ki aalam-panah

qaul se phirte nahin hain baadshah

qatl ho jae ye bad-qismat shitab

kijiye dil khol kar is par itab

ye itab-e-shah jald hi dur ho

aur dil sarkar ka masrur ho

baadshah ko aa gai is par hansi

pai mujrim ne dobara zindagi

masKHare ki aql par sab shad the

gham-zada dil aish se aabaad the

bach gai ek jaan us ki baat se

ho gaya bekas riha aafat se