aql-o-dil

'aql ne ek din ye dil se kahā

bhūle-bhaTke kī rahnumā huuñ maiñ

huuñ zamīñ par guzar falak pe mirā

dekh tū kis qadar rasā huuñ maiñ

kaam duniyā meñ rahbarī hai mirā

misl-e-ḳhizr-e-ḳhajista-pā huuñ meñ

huuñ mufassir kitāb-e-hastī kī

maz.har-e-shān-e-kibriyā huuñ maiñ

buuñd ik ḳhuun kī hai tū lekin

ġhairat-e-lā'l-e-be-bahā huuñ maiñ

dil ne sun kar kahā ye sab sach hai

par mujhe bhī to dekh kyā huuñ maiñ

rāz-e-hastī ko tū samajhtī hai

aur āñkhoñ se dekhtā huuñ maiñ

hai tujhe vāsta mazāhir se

aur bātin se āshnā huuñ maiñ

'ilm tujh se to mā'rifat mujh se

tū ḳhudā jo ḳhudā-numā huuñ maiñ

'ilm kī intihā hai betābi

us maraz kī magar davā huuñ maiñ

sham' tū mahfil-e-sadāqat kī

husn kī bazm kā diyā huuñ maiñ

tū zamān-o-makāñ se rishta bapā

tā.ir-e-sidra-āshnā huuñ maiñ

kis bulandī pe hai maqām mirā

'arsh rabb-e-jalīl kā huuñ maiñ

'aql ne ek din ye dil se kaha

bhule-bhaTke ki rahnuma hun main

hun zamin par guzar falak pe mera

dekh tu kis qadar rasa hun main

kaam duniya mein rahbari hai mera

misl-e-KHizr-e-KHajista-pa hun mein

hun mufassir kitab-e-hasti ki

mazhar-e-shan-e-kibriya hun main

bund ek KHun ki hai tu lekin

ghairat-e-la'l-e-be-baha hun main

dil ne sun kar kaha ye sab sach hai

par mujhe bhi to dekh kya hun main

raaz-e-hasti ko tu samajhti hai

aur aankhon se dekhta hun main

hai tujhe wasta mazahir se

aur baatin se aashna hun main

'ilm tujh se to ma'rifat mujh se

tu KHuda jo KHuda-numa hun main

'ilm ki intiha hai betabi

us maraz ki magar dawa hun main

sham' tu mahfil-e-sadaqat ki

husn ki bazm ka diya hun main

tu zaman-o-makan se rishta bapa

tair-e-sidra-ashna hun main

kis bulandi pe hai maqam mera

'arsh rabb-e-jalil ka hun main