ashk tara karo

vaqt kī āstīnoñ meñ palte hue qahqahe

jhaaḌ do

apne lab gaaḌ do

ā.inoñ meñ bikhartī huī

apnī be-chehragī ke Tahalte hue saa.e par

muskurāhaT ujālo na.ī sub.h ta.amīr karne kā chāra karo

istiḳhāra karo

saarī afsurdagī aur sarāsīmgī

sansanāte hue

apnī qāmat se ghaT kar ka.ī

munhadim dā.eroñ meñ badal jā.egī

ye jo hālāt kī dasht-āñkhoñ se ham par lapaktī huī

lū hai kaT jā.egī

pyaas chhaT jā.egī

be-amāñ mausamoñ ke badan par chahakte hue silsile

karb-ālūd lahje bhī khul jā.eñge

hausle gā.eñge

vaqt ke zard māthe pe bal aa.egā

nā-umīdī kā har ek imkān jal jā.egā

raushnī kā shajar

apnī shāḳhoñ ko phailā.egā

āsmāñ apne dāman se pinhāñ guhar

sab pe barsā.egā

ziist ko nuurī ḳhushbū se mahkā.egā

muskurāhaT ujālo na.ī sub.h ta.amīr karne kā chāra karo

ashk taarā karo

waqt ki aastinon mein palte hue qahqahe

jhaD do

apne lab gaD do

aainon mein bikharti hui

apni be-chehragi ke Tahalte hue sae par

muskurahaT ujalo nai subh tamir karne ka chaara karo

istiKHara karo

sari afsurdagi aur sarasimgi

sansanate hue

apni qamat se ghaT kar kai

munhadim daeron mein badal jaegi

ye jo haalat ki dasht-ankhon se hum par lapakti hui

lu hai kaT jaegi

pyas chhaT jaegi

be-aman mausamon ke badan par chahakte hue silsile

karb-alud lahje bhi khul jaenge

hausle gaenge

waqt ke zard mathe pe bal aaega

na-umidi ka har ek imkan jal jaega

raushni ka shajar

apni shaKHon ko phailaega

aasman apne daman se pinhan guhar

sab pe barsaega

zist ko nuri KHushbu se mahkaega

muskurahaT ujalo nai subh tamir karne ka chaara karo

ashk tara karo