asia jag uTha

asia jaag uThā ḳhvāb-e-girāñ se kaise

dil-nashīñ jism meñ ik zahr kā tūfān liye

keñchulī badle hue saañp kī phunkār liye

har shaqāvat ke liye maut kā sāmān liye

asia jaag uThā

ahl-e-mashriq ko na.ī ziist kī phir se hai talāsh

ye taḌapte hue gūñge ye bilakte haivāñ

apne āqāoñ ke derīna ġhulāmoñ kī ye laash

zulm toḌā kiyā insān pe sadiyoñ insāñ

ziist be-nūr charāġhoñ meñ se lau de uTThī

ik kiran sard añdhere meñ se zau de uTThī

asia jaag uThā

ahl-e-mashriq kī taraqqī ke payambar larze

kapkapāne lage aivānoñ ke sangīn sutūñ

vo jahāñ naaz bhī naḳhvat hai masarrat bhī ġhurūr

jin meñ nikhrā kiyā insāñ kī ta.allī kā junūñ

sāl-hā-sāl se tapte hue faulād ke raaz

sāl-hā-sāl se fankāroñ ke tarshe hue but

rah na jaa.e kahīñ mashriq meñ hī maġhrib kī ye rut

ahl-e-mashriq pe shaqāvat kī koī had hī nahīñ

apne dushman kī zalālat kī koī had hī nahīñ

asia jaag uThā

apnī zillat ke samet apnī hifāzat ke liye

is qadāmat ke samet apnī saqāfat ke liye

asia arz-e-muqaddas bhī farozāñ hogī

ham ġharīboñ kī ġhamīñ ziist bhī tābāñ hogī

asia jaag uThā jaag uThā jaag uThā

asia jag uTha KHwab-e-giran se kaise

dil-nashin jism mein ek zahr ka tufan liye

kenchuli badle hue sanp ki phunkar liye

har shaqawat ke liye maut ka saman liye

asia jag uTha

ahl-e-mashriq ko nai zist ki phir se hai talash

ye taDapte hue gunge ye bilakte haiwan

apne aaqaon ke derina ghulamon ki ye lash

zulm toDa kiya insan pe sadiyon insan

zist be-nur charaghon mein se lau de uTThi

ek kiran sard andhere mein se zau de uTThi

asia jag uTha

ahl-e-mashriq ki taraqqi ke payambar larze

kapkapane lage aiwanon ke sangin sutun

wo jahan naz bhi naKHwat hai masarrat bhi ghurur

jin mein nikhra kiya insan ki talli ka junun

sal-ha-sal se tapte hue faulad ke raaz

sal-ha-sal se fankaron ke tarshe hue but

rah na jae kahin mashriq mein hi maghrib ki ye rut

ahl-e-mashriq pe shaqawat ki koi had hi nahin

apne dushman ki zalalat ki koi had hi nahin

asia jag uTha

apni zillat ke samet apni hifazat ke liye

is qadamat ke samet apni saqafat ke liye

asia arz-e-muqaddas bhi farozan hogi

hum gharibon ki ghamin zist bhi taban hogi

asia jag uTha jag uTha jag uTha