asir-e-ishq

jis tarah parinda sahrā kā paanī kī talāsh meñ phirtā hai

tū DhūñDhtā mujh ko aa.egā kyoñ mujh se nafrat kartā hai

kyā merī judā.ī se bhī taḌap dil kī tire tez nahīñ hotī

kyā bastiyāñ armānoñ kī tirī siine meñ paḌī haiñ yūñhī sotī

kyā mere tasavvur se bhī tire jazbāt meñ josh nahīñ aatā

kyā ḳhuun kā ik qatra bhī tirā aisā nahīñ jo garmā jaatā

jo dil hai tirā vo merā hai aur merī itā.at kartā hai

kamzor mohabbat hai terī par dam vo mirā hī bhartā hai

maiñ thāme hue huuñ hāthoñ se phande maiñ mire hai vo goyā

yā daam meñ jaise murġh koī daana kī havas meñ ho aayā

uḌ jā hai ijāzat tujh ko mirī par halqa-e-ulfat se bāhar

tū uḌ nahīñ saktā ai pyāre gar ghuum bhī le sab bahr-o-bar

jis tarah parinda sahra ka pani ki talash mein phirta hai

tu DhunDhta mujh ko aaega kyon mujh se nafrat karta hai

kya meri judai se bhi taDap dil ki tere tez nahin hoti

kya bastiyan armanon ki teri sine mein paDi hain yunhi soti

kya mere tasawwur se bhi tere jazbaat mein josh nahin aata

kya KHun ka ek qatra bhi tera aisa nahin jo garma jata

jo dil hai tera wo mera hai aur meri itaat karta hai

kamzor mohabbat hai teri par dam wo mera hi bharta hai

main thame hue hun hathon se phande main mere hai wo goya

ya dam mein jaise murgh koi dana ki hawas mein ho aaya

uD ja hai ijazat tujh ko meri par halqa-e-ulfat se bahar

tu uD nahin sakta ai pyare gar ghum bhi le sab bahr-o-bar