aTuT ang

mirā sar tum apne hī zaanū pe rakh kar

mujhe pūchhtī ho!

ki meñ kaun huuñ

kyā huuñ, kaise huuñ?

saare savāloñ ko muTThī meñ rakh kar

zarā merī ik baat san lo

suno! ye tumhāre badan kā ḳhumār-āshnā kaif... narm o musalsal

mujhe lazzatoñ ke umuq meñ liye jā rahā hai

maiñ pal pal kabhī

lahza lahza kabhī

dhīre dhīre kabhī

lamha lamha kabhī

ek dariyā ke phailāv meñ Dūbtā jā rahā huuñ

sharābor tūfān meñ tund lahroñ kī sūrat

nashīle samay

ek āhañg ke saath hachkole khātā huā

maiñ kisī soch kī rau meñ bahtā chalā jā rahā huuñ

mirā dil, mirī jaañ:

donoñ hī mausūm haiñ, us tamavvuj se

jo merī nas nas meñ paiham machaltā huā

ḳhuun ke zer-o-bam kī kahānī sunātā huā

bah rahā hai

ki jis ke har ek lams kī

lazzatoñ, zā.iqoñ meñ

tumhārā koī ḳhvāb hai

jaise mahtāb hai

tum to mere badan kā koī pāra-e-ḳhāk ho

tum koī ġhair ho?

merī ham-zād!

ham kashtī-e-zīst ke bādbāñ kī tanābeñ haiñ do

ek tum, ek maiñ

jin kā mohtāj hai bādbān-e-nafas

ye zamīñ, ye zamāñ

mere hī ahd kī dāstāñ

ham se ābād daa.em bisāt-e-jahāñ

apne āñgan kī phūloñ-bharī kiyāriyāñ

mera sar tum apne hi zanu pe rakh kar

mujhe puchhti ho!

ki mein kaun hun

kya hun, kaise hun?

sare sawalon ko muTThi mein rakh kar

zara meri ek baat san lo

suno! ye tumhaare badan ka KHumar-ashna kaif narm o musalsal

mujhe lazzaton ke umuq mein liye ja raha hai

main pal pal kabhi

lahza lahza kabhi

dhire dhire kabhi

lamha lamha kabhi

ek dariya ke phailaw mein Dubta ja raha hun

sharabor tufan mein tund lahron ki surat

nashile samay

ek aahang ke sath hachkole khata hua

main kisi soch ki rau mein bahta chala ja raha hun

mera dil, meri jaan:

donon hi mausum hain, us tamawwuj se

jo meri nas nas mein paiham machalta hua

KHun ke zer-o-bam ki kahani sunata hua

bah raha hai

ki jis ke har ek lams ki

lazzaton, zaiqon mein

tumhaara koi KHwab hai

jaise mahtab hai

tum to mere badan ka koi para-e-KHak ho

tum koi ghair ho?

meri ham-zad!

hum kashti-e-zist ke baadban ki tanaben hain do

ek tum, ek main

jin ka mohtaj hai baadban-e-nafas

ye zamin, ye zaman

mere hi ahd ki dastan

hum se aabaad daem bisat-e-jahan

apne aangan ki phulon-bhari kiyariyan