aur phir yun hua

aur phir yuuñ huā

jo purānī kitābeñ purāne sahīfe

buzurgoñ se virse meñ ham ko mile the

unheñ paḌh ke ham sab ye mahsūs karne lage

in ke alfāz se koī matlab nikaltā nahīñ hai

jo tā’bīr-o-tafsīr agloñ ne kī thī

ma'ānī-o-mafhūm jo un pe chaspāñ kiye the

ab un kī haqīqat kisī vāhime se ziyāda nahīñ hai

aur phir yuuñ huā

chand logoñ ne ye aa ke ham ko batāyā

ki ab in purānī kitāboñ ko tah kar ke rakh do

hamāre vasīle se

tum par na.ī kuchh kitābeñ utārī ga.ī haiñ

unheñ tum paḌhoge

to tum par sadāqat na.e taur se munkashif hogī

bosīda-o-munjamid zehn meñ

khiḌkiyāñ khul sakeñgī

tumheñ ‘ilm-o-‘irfān aur āgahī ke ḳhazīne mileñge

aur phir yuuñ huā

un kitāboñ ko apnī kitābeñ samajh kar

unheñ apne siine se ham ne lagāyā

har ik lafz kā vird karte rahe

ek ik satr ko gungunāte rahe

ek ik harf kā ras piyā

aur hameñ mil gayā

jaise mā'nī-o-mafhūm kā ik nayā silsila

aur phir yuuñ huā

un kitāboñ se ik din ye ham ko bashārat milī

aane vaalā hai duniyā meñ ab ik nayā aadmī

le ke apne jilau meñ na.ī zindagī

ham añdherī guphāoñ se auhām kī tang galiyoñ se nikleñge

ham ko milegī na.ī raushnī

aur phir yuuñ huā

laane vaale kitāboñ ke

aur vo bhī jo un pe īmān laa.e the

sab apne apne gharoñ se nikal kar

kisī samt ko chal paḌe

aise ik rāste par jidhar se nayā aadmī

aane vaalā thā yā ham ko us kā yaqīñ thā

ki vo aa.egā

aur usī samt se bas usī samt se aa.egā

aur phir yuuñ huā

der tak ham na.e aadmī ke rahe muntazir

der tak shauq-e-dīdār kī apnī āñkhoñ meñ mastī rahī

der tak us kī aamad kā ham giit gaate rahe

der tak us kī tasvīr zehnoñ meñ apne banāte rahe

der tak is ḳharābe meñ ik jashn hotā rahā

aur phir yuuñ huā

der tak

aur bhī der tak

jab na ham ko milā

aane vaale kā koī pata

us ke qadmoñ kī koī na aahaT milī

ham ne phir zor se us ko āvāz dī

ai na.e aadmī

ai na.e aadmī

aur ye āvāz ūñche pahāḌoñ se Takrā ke

be-nām sahrāoñ se lauT kar

phir hamārī taraf aa ga.ī

aur phir yuuñ huā

chand logoñ ne sochā ki shāyad nayā aadmī

aa.egā aur hī samt se

dūsre chand logoñ ne sochā

ki shāyad nayā aadmī aa.egā aur hī samt se

aur phir har taraf qāfile qāfile

aur phir har taraf rāste rāste

aur phir yuuñ huā

der tak us na.e aadmī kī rahī justujū

us ko āvāz dete rahe chār-sū

kū-ba-kū qarya qarya use ham bulāte rahe

manziloñ manziloñ ḳhaak uḌāte rahe

aur phir yuuñ huā

sab ke chehre usī ḳhaak meñ aT ga.e

sab kī āñkhoñ meñ ik tīrgī chhā ga.ī

sab ko Dasne lagī raah kī be-hisī

aur phir sab vo ik dūsre ke liye

ajnabī ho ga.e

aur phir sab ke sab dhund meñ kho ga.e

aur phir yuuñ huā

ham ne phir ghar pe aa kar kitāboñ ke aurāq khole

unheñ phir se paḌhne kī ḳhātir uThāyā

har ik satr par ġhaur karte rahe der tak

aur har lafz ko dūsre lafz se joḌ kar

silsila harf-o-naġhma kā saut-o-sadā kā milāte rahe

aur phir yās-o-ummīd ke darmiyāñ

DhūñDte hī rahe is na.e aadmī kā nishāñ

aur hameñ bas milīñ

apnī āvāz kī zard sūkhī huī patiyāñ

aur phir yuuñ huā

ham se sūraj ka.ī roz rūThā rahā

āsmānoñ se uThtī rahīñ tah-ba-tah badliyāñ

kaalī kaalī nazar aa.iiñ sab vādiyāñ

kaale ghar kaalī dīvāreñ kaalī chhateñ

kaalī saḌkoñ pe chaltī huī kaalī parchhā.īyāñ

ye zamīñ kaale sāgar meñ ik naav kī tarh se Dagmagāne lagī

maut kī niiñd aane lagī

aur phir yuuñ huā

ham ne apne gharoñ meñ jalā.e ḳhud apne diye

ham ne bikhre hue ḳhvāb TuuTe hue aa.ine

phir se joḌe

bujhe jism kī raakh se

sar uThāte hue ek nanhe se sho'le ko

aur apne chehre meñ ik aur chehre ko dekhā

phir apne lahū kī sadā.eñ sunīñ

aur apne liye aap apnī kitābeñ likhīñ

aur phir yun hua

jo purani kitaben purane sahife

buzurgon se wirse mein hum ko mile the

unhen paDh ke hum sab ye mahsus karne lage

in ke alfaz se koi matlab nikalta nahin hai

jo ta’bir-o-tafsir aglon ne ki thi

ma'ani-o-mafhum jo un pe chaspan kiye the

ab un ki haqiqat kisi wahime se ziyaada nahin hai

aur phir yun hua

chand logon ne ye aa ke hum ko bataya

ki ab in purani kitabon ko tah kar ke rakh do

hamare wasile se

tum par nai kuchh kitaben utari gai hain

unhen tum paDhoge

to tum par sadaqat nae taur se munkashif hogi

bosida-o-munjamid zehn mein

khiDkiyan khul sakengi

tumhein ‘ilm-o-‘irfan aur aagahi ke KHazine milenge

aur phir yun hua

un kitabon ko apni kitaben samajh kar

unhen apne sine se hum ne lagaya

har ek lafz ka wird karte rahe

ek ek satr ko gungunate rahe

ek ek harf ka ras piya

aur hamein mil gaya

jaise ma'ni-o-mafhum ka ek naya silsila

aur phir yun hua

un kitabon se ek din ye hum ko bashaarat mili

aane wala hai duniya mein ab ek naya aadmi

le ke apne jilau mein nai zindagi

hum andheri guphaon se auham ki tang galiyon se niklenge

hum ko milegi nai raushni

aur phir yun hua

lane wale kitabon ke

aur wo bhi jo un pe iman lae the

sab apne apne gharon se nikal kar

kisi samt ko chal paDe

aise ek raste par jidhar se naya aadmi

aane wala tha ya hum ko us ka yaqin tha

ki wo aaega

aur usi samt se bas usi samt se aaega

aur phir yun hua

der tak hum nae aadmi ke rahe muntazir

der tak shauq-e-didar ki apni aankhon mein masti rahi

der tak us ki aamad ka hum git gate rahe

der tak us ki taswir zehnon mein apne banate rahe

der tak is KHarabe mein ek jashn hota raha

aur phir yun hua

der tak

aur bhi der tak

jab na hum ko mila

aane wale ka koi pata

us ke qadmon ki koi na aahaT mili

hum ne phir zor se us ko aawaz di

ai nae aadmi

ai nae aadmi

aur ye aawaz unche pahaDon se Takra ke

be-nam sahraon se lauT kar

phir hamari taraf aa gai

aur phir yun hua

chand logon ne socha ki shayad naya aadmi

aaega aur hi samt se

dusre chand logon ne socha

ki shayad naya aadmi aaega aur hi samt se

aur phir har taraf qafile qafile

aur phir har taraf raste raste

aur phir yun hua

der tak us nae aadmi ki rahi justuju

us ko aawaz dete rahe chaar-su

ku-ba-ku qarya qarya use hum bulate rahe

manzilon manzilon KHak uDate rahe

aur phir yun hua

sab ke chehre usi KHak mein aT gae

sab ki aankhon mein ek tirgi chha gai

sab ko Dasne lagi rah ki be-hisi

aur phir sab wo ek dusre ke liye

ajnabi ho gae

aur phir sab ke sab dhund mein kho gae

aur phir yun hua

hum ne phir ghar pe aa kar kitabon ke auraq khole

unhen phir se paDhne ki KHatir uThaya

har ek satr par ghaur karte rahe der tak

aur har lafz ko dusre lafz se joD kar

silsila harf-o-naghma ka saut-o-sada ka milate rahe

aur phir yas-o-ummid ke darmiyan

DhunDte hi rahe is nae aadmi ka nishan

aur hamein bas milin

apni aawaz ki zard sukhi hui patiyan

aur phir yun hua

hum se suraj kai roz ruTha raha

aasmanon se uThti rahin tah-ba-tah badliyan

kali kali nazar aain sab wadiyan

kale ghar kali diwaren kali chhaten

kali saDkon pe chalti hui kali parchhaiyan

ye zamin kale sagar mein ek naw ki tarh se Dagmagane lagi

maut ki nind aane lagi

aur phir yun hua

hum ne apne gharon mein jalae KHud apne diye

hum ne bikhre hue KHwab TuTe hue aaine

phir se joDe

bujhe jism ki rakh se

sar uThate hue ek nanhe se sho'le ko

aur apne chehre mein ek aur chehre ko dekha

phir apne lahu ki sadaen sunin

aur apne liye aap apni kitaben likhin