aurat

aurat ko samjho na jāgīr apnī

na ye ḳhvāb apnā na ta.abīr apnī

ulajhtī hai ḳhud se ye lāchār ho kar

har ik baat samjhe ye taqsīr apnī

ye kartī hai har ik sitam ko gavārā

banātī hai aise ye taqdīr apnī

satā.egā is ko batā kyā zamāna

sināñ jis kī apnī hai shamshīr apnī

nivāle kī ḳhātir ye hurmat na beche

sañbhāle ye izzat va tauqīr apnī

kare dafn ḳhvāhish ko apne hī hāthoñ

masḳh kyoñ karegī ye tasvīr apnī

shikāyat laboñ pe na lā.egī hargiz

tabī.at rahe chāhe dil-gīr apnī

agar yuuñ hī chaltā rahā silsila to

yaqīnan ye toḌegī zanjīr apnī

aurat ko samjho na jagir apni

na ye KHwab apna na tabir apni

ulajhti hai KHud se ye lachaar ho kar

har ek baat samjhe ye taqsir apni

ye karti hai har ek sitam ko gawara

banati hai aise ye taqdir apni

sataega is ko bata kya zamana

sinan jis ki apni hai shamshir apni

niwale ki KHatir ye hurmat na beche

sanbhaale ye izzat wa tauqir apni

kare dafn KHwahish ko apne hi hathon

masKH kyon karegi ye taswir apni

shikayat labon pe na laegi hargiz

tabiat rahe chahe dil-gir apni

agar yun hi chalta raha silsila to

yaqinan ye toDegi zanjir apni