aurat

duniyā ke liye tohfa-e-nāyāb hai aurat

afsāna-e-hastī kā hasīñ baab hai aurat

dekhā thā jo aadam ne vahī ḳhvāb hai aurat

be-misl hai ā.īna-e-ādāb hai aurat

qaa.em usī aurat se mohabbat kī fazā hai

aurat kī atā asal meñ ehsān-e-ḳhudā hai

hai maañ to dil-o-jāñ se luTātī hai sadā pyaar

mamtā ke liye phirtī hai daulat sar-e-bāzār

āsān banātī hai duā se rah-e-dushvār

apne ġham-o-ālām kā kartī nahīñ iz.hār

qadmoñ meñ liye rahtī hai jannat kā ḳhazāna

aurat ke tasavvur meñ hai ta.amīr-e-zamāna

biivī hai to ġham-ḳhvār hai paikar hai vafā kā

āñchal ko banā letī hai fānūs hayā kā

ruḳh dekh ke rakhtī hai qadam apnā havā kā

girvīda banātī hai tabassum kī adā kā

ḳhvāb-e-nigah-e-ishq kī ta.abīr hai aurat

mardoñ ke liye husn kī zanjīr hai aurat

hai shakl meñ beTī kī bahār-e-sahr-o-shām

qudrat kā atiya hai ye qudrat kā hai in.aam

detī hai masarrat kā dil-e-zār ko paiġhām

hai ruuh ko taskīn jigar kā hai ye ārām

duḳhtar hai to anmol guhar kahte haiñ us ko

allāh kī rahmat kā samar kahte haiñ is ko

sūrat meñ bahan kī hai chaman kā ye hasīñ phuul

īsār-o-mohabbat hai shab-o-roz kā ma.amūl

be-kār kī ranjish ko kabhī detī nahīñ tuul

ehsās-e-muravvat meñ rahā kartī hai mashġhūl

likhī hai har ik rañg meñ aurat kī kahānī

kahte haiñ use azmat-e-insāñ kī nishānī

mariyam hai to pākīza-o-shaffaf haiñ a.amāl

ban jaa.e zuleḳhā to hayā ko kare pāmāl

gar hai cleopatra to siyāsat kī chale chaal

lailā hai to kartī hai ye dīvāna-o-bad-hāl

Dhal jaanā har ik ruup meñ āsān hai us ko

badle hue hālāt kī pahchān hai us ko

'hinda' hai to sālārī kā dikhlātī hai jauhar

hai 'rābi.a-basrī' to ye valiyoñ kī hai ham-sar

baiThī hai agar husn kā bāzār sajā kar

ġhairat ko banātī hai asīr-e-havas-e-zar

vāqif hai bahar-taur ye jiine ke hunar se

be-ḳhauf guzar jaatī hai har rāhguzar se

ik pal meñ ye sho.ala hai to ik pal meñ hai shabnam

ya.anī hai kabhī gul to kabhī ḳhār-e-mujassam

ho sabr pe āmāda to sah jaa.e har ik ġham

ho jaa.e muḳhālif to palaT de saf-e-ālam

pāband-e-vafā ho to dil-o-jān luTā de

aa jaa.e baġhāvat pe to duniyā ko hilā de

duniya ke liye tohfa-e-nayab hai aurat

afsana-e-hasti ka hasin bab hai aurat

dekha tha jo aadam ne wahi KHwab hai aurat

be-misl hai aaina-e-adab hai aurat

qaem usi aurat se mohabbat ki faza hai

aurat ki ata asal mein ehsan-e-KHuda hai

hai man to dil-o-jaan se luTati hai sada pyar

mamta ke liye phirti hai daulat sar-e-bazar

aasan banati hai dua se rah-e-dushwar

apne gham-o-alam ka karti nahin izhaar

qadmon mein liye rahti hai jannat ka KHazana

aurat ke tasawwur mein hai tamir-e-zamana

biwi hai to gham-KHwar hai paikar hai wafa ka

aanchal ko bana leti hai fanus haya ka

ruKH dekh ke rakhti hai qadam apna hawa ka

girwida banati hai tabassum ki ada ka

KHwab-e-nigah-e-ishq ki tabir hai aurat

mardon ke liye husn ki zanjir hai aurat

hai shakl mein beTi ki bahaar-e-sahr-o-sham

qudrat ka atiya hai ye qudrat ka hai inam

deti hai masarrat ka dil-e-zar ko paigham

hai ruh ko taskin jigar ka hai ye aaram

duKHtar hai to anmol guhar kahte hain us ko

allah ki rahmat ka samar kahte hain is ko

surat mein bahan ki hai chaman ka ye hasin phul

isar-o-mohabbat hai shab-o-roz ka mamul

be-kar ki ranjish ko kabhi deti nahin tul

ehsas-e-murawwat mein raha karti hai mashghul

likhi hai har ek rang mein aurat ki kahani

kahte hain use azmat-e-insan ki nishani

mariyam hai to pakiza-o-shaffaf hain aamal

ban jae zuleKHa to haya ko kare pamal

gar hai cleopatra to siyasat ki chale chaal

laila hai to karti hai ye diwana-o-bad-haal

Dhal jaana har ek rup mein aasan hai us ko

badle hue haalat ki pahchan hai us ko

'hinda' hai to salari ka dikhlati hai jauhar

hai 'rabia-basri' to ye waliyon ki hai ham-sar

baiThi hai agar husn ka bazar saja kar

ghairat ko banati hai asir-e-hawas-e-zar

waqif hai bahar-taur ye jine ke hunar se

be-KHauf guzar jati hai har rahguzar se

ek pal mein ye shoala hai to ek pal mein hai shabnam

yani hai kabhi gul to kabhi KHar-e-mujassam

ho sabr pe aamada to sah jae har ek gham

ho jae muKHalif to palaT de saf-e-alam

paband-e-wafa ho to dil-o-jaan luTa de

aa jae baghawat pe to duniya ko hila de