aurat

haqdār jis kī huuñ vo mohabbat nahīñ milī

aurat huuñ maiñ mujhe mirī azmat nahīñ milī

vāqif nahīñ hai koī mire iztirāb se

har shaḳhs mujh ko paḌhtā hai apne hisāb se

mujh ko likhā har ek ne apnī kitāb se

jaise bhī jis ne chāhā navāzā ḳhitāb se

vābasta mujh se merī haqīqat nahīñ milī

aurat huuñ maiñ mujhe mirī azmat nahīñ milī

jab chāhā mujh ko ek tavā.if banā diyā

maqsad hī mere janm kā dil se bhulā diyā

phūloñ kī sej dī kabhī mujh ko jalā diyā

siitā banā ke sho.aloñ meñ mujh ko biThā diyā

jiine kī ek pal ko bhī rāhat nahīñ milī

aurat huuñ maiñ mujhe mirī azmat nahīñ milī

pal pal añdherī raat meñ jalnā paḌā bhī hai

mahfil meñ ban ke sham.a pighalnā paḌā bhī hai

girne pe dūsroñ ke sañbhalnā paḌā bhī hai

jhūTī tasallī pā ke bahalnā paḌā bhī hai

vābasta mujh se merī haqīqat nahīñ milī

aurat huuñ maiñ mujhe mirī azmat nahīñ milī

jaanā gayā na mujh ko kabhī mere naam se

rishtoñ meñ mujh ko bāñdhā gayā ehtimām se

nisbat jo log apnī batāte haiñ raam se

ban-bās mujh ko dete haiñ siitā ke naam se

bātoñ meñ aur amal meñ sadāqat nahīñ milī

aurat huuñ maiñ mujhe mirī azmat nahīñ milī

aatā hai zindagī meñ mirī ye bhī hādisa

merī hañsī zamāne ko lagtī hai sāneha

qurbāniyoñ kā miltā hai kuchh is tarah silā

phūloñ ko pā luuñ ḳhushbū se rakkhūñ na vāsta

qismat ke khoTe sikke ko qīmat nahīñ milī

aurat huuñ maiñ mujhe mirī azmat nahīñ milī

maiñ jab nahīñ rahūñgī bhalā kyā kareñge aap

har lamha mere vāste royā kareñge aap

qurbat ko mere pyaar kī DhūñDā kareñge aap

ik hashr is jahān meñ barpā kareñge aap

har-dam yahī kaheñge ki aurat nahīñ milī

aurat huuñ maiñ mujhe mirī azmat nahīñ milī

haqdar jis ki hun wo mohabbat nahin mili

aurat hun main mujhe meri azmat nahin mili

waqif nahin hai koi mere iztirab se

har shaKHs mujh ko paDhta hai apne hisab se

mujh ko likha har ek ne apni kitab se

jaise bhi jis ne chaha nawaza KHitab se

wabasta mujh se meri haqiqat nahin mili

aurat hun main mujhe meri azmat nahin mili

jab chaha mujh ko ek tawaif bana diya

maqsad hi mere janm ka dil se bhula diya

phulon ki sej di kabhi mujh ko jala diya

sita bana ke shoalon mein mujh ko biTha diya

jine ki ek pal ko bhi rahat nahin mili

aurat hun main mujhe meri azmat nahin mili

pal pal andheri raat mein jalna paDa bhi hai

mahfil mein ban ke shama pighalna paDa bhi hai

girne pe dusron ke sanbhalna paDa bhi hai

jhuTi tasalli pa ke bahalna paDa bhi hai

wabasta mujh se meri haqiqat nahin mili

aurat hun main mujhe meri azmat nahin mili

jaana gaya na mujh ko kabhi mere nam se

rishton mein mujh ko bandha gaya ehtimam se

nisbat jo log apni batate hain ram se

ban-bas mujh ko dete hain sita ke nam se

baaton mein aur amal mein sadaqat nahin mili

aurat hun main mujhe meri azmat nahin mili

aata hai zindagi mein meri ye bhi hadisa

meri hansi zamane ko lagti hai saneha

qurbaniyon ka milta hai kuchh is tarah sila

phulon ko pa lun KHushbu se rakkhun na wasta

qismat ke khoTe sikke ko qimat nahin mili

aurat hun main mujhe meri azmat nahin mili

main jab nahin rahungi bhala kya karenge aap

har lamha mere waste roya karenge aap

qurbat ko mere pyar ki DhunDa karenge aap

ek hashr is jahan mein barpa karenge aap

har-dam yahi kahenge ki aurat nahin mili

aurat hun main mujhe meri azmat nahin mili