aurat

jā rahā hai apnī manzil kī taraf māh-e-tamām

jaise qabroñ ke mujāvir jaise masjid ke imaam

ḳhānqāhoñ meñ huā kartā hai jaise bil-umūm

shaiḳh kī ḳhidmat meñ hāzir hai murīdoñ kā hujūm

is tarah mehrāb meñ rakkhī hai ilhāmī kitāb

jaise ik zāhid kā īmāñ jaise ik baasī gulāb

taaq meñ rakkhī huī hai ik taraf ik jā-namāz

uud kī ḳhushbū se hai mahkā huā har pāk-bāz

mahv hai zikr-e-ḳhafī meñ zāhid-e-shab zinda-dār

baiThe baiThe chauñk paḌtā hai magar be-iḳhtiyār

piir sāhab hī nahīñ har shaḳhs hai khoyā huā

nā-gahāñ un meñ se ik yuuñ bā-adab goyā huā

hādī-e-rāh-e-tarīqat murshid-e-raushan-zamīr

āsmān-e-azm-o-istiqlāl ke mehr-e-munīr

kyā kabhī aurat kā nazzāra bhī kar saktā huuñ maiñ

kyā kabhī is raah se āsāñ guzar saktā huuñ maiñ

dekhnā us kī taraf hargiz na ai mard-e-javāñ

varna miT jā.egā peshānī se sajde kā nishāñ

aap kā irshād sar-āñkhoñ pe lekin Dar ye hai

chubh na jaa.e phāñs ban kar dil meñ ye nāzuk sī shai

yaad rakh dil par na hone paa.e aurat kā asar

muskurā.e bhī agar āñkhoñ meñ āñkheñ Daal kar

ik zarā sī baat hī kar luuñ to kyā ho jā.egā

bas yahī nā aap sā rahbar ḳhafā ho jā.egā

tujh ko apnī fikr karnī chāhiye har haal meñ

achchhe achchhe log aa jaate haiñ is kī chaal meñ

is pe la.anat ho ḳhudā kī ye hai shaitānoñ kī raah

saiñkaḌoñ mardoñ ko kar detī hai ik pal meñ tabāh

guftugū ye ḳhatm hone bhī na paa.ī thī abhī

ek aurat god meñ bachcha liye dāḳhil huī

piir ghabrā.e murīdoñ ko pasīna aa gayā

zindagī kā har taḳhayyul maut ban kar chhā gayā

ja raha hai apni manzil ki taraf mah-e-tamam

jaise qabron ke mujawir jaise masjid ke imam

KHanqahon mein hua karta hai jaise bil-umum

shaiKH ki KHidmat mein hazir hai muridon ka hujum

is tarah mehrab mein rakkhi hai ilhami kitab

jaise ek zahid ka iman jaise ek basi gulab

taq mein rakkhi hui hai ek taraf ek ja-namaz

ud ki KHushbu se hai mahka hua har pak-baz

mahw hai zikr-e-KHafi mein zahid-e-shab zinda-dar

baiThe baiThe chaunk paDta hai magar be-iKHtiyar

pir sahab hi nahin har shaKHs hai khoya hua

na-gahan un mein se ek yun ba-adab goya hua

hadi-e-rah-e-tariqat murshid-e-raushan-zamir

aasman-e-azm-o-istiqlal ke mehr-e-munir

kya kabhi aurat ka nazzara bhi kar sakta hun main

kya kabhi is rah se aasan guzar sakta hun main

dekhna us ki taraf hargiz na ai mard-e-jawan

warna miT jaega peshani se sajde ka nishan

aap ka irshad sar-ankhon pe lekin Dar ye hai

chubh na jae phans ban kar dil mein ye nazuk si shai

yaad rakh dil par na hone pae aurat ka asar

muskurae bhi agar aankhon mein aankhen Dal kar

ek zara si baat hi kar lun to kya ho jaega

bas yahi na aap sa rahbar KHafa ho jaega

tujh ko apni fikr karni chahiye har haal mein

achchhe achchhe log aa jate hain is ki chaal mein

is pe lanat ho KHuda ki ye hai shaitanon ki rah

sainkaDon mardon ko kar deti hai ek pal mein tabah

guftugu ye KHatm hone bhi na pai thi abhi

ek aurat god mein bachcha liye daKHil hui

pir ghabrae muridon ko pasina aa gaya

zindagi ka har taKHayyul maut ban kar chha gaya