ayaadat

ye kaun aa gayā ruḳh-e-ḳhandāñ liye hue

aariz pe rañg-o-nūr kā tūfāñ liye hue

bīmār ke qarīb ba-sad-shān-e-ehtiyāt

dildārī-e-nasīm-e-bahārāñ liye hue

ruḳhsār par latīf sī ik mauj-e-sar-ḳhushī

lab par hañsī kā narm sā tūfāñ liye hue

peshānī-e-jamīl pe anvār-e-tamkanat

tābindagī-e-sub.h-e-daraḳhshāñ liye hue

zulfoñ ke pech-o-ḳham meñ bahāreñ chhupī huī

ik kārvān-e-nikhat-e-bustāñ liye hue

aa hī gayā vo merā nigār-e-nazar-navāz

zulmat-kade meñ sham-e-farozāñ liye hue

ik ik adā meñ saikaḌoñ pahlū-e-dildahī

ik ik nazar meñ pursish-e-pinhāñ liye hue

mere savād-e-shauq kā ḳhurshīd-e-nīm-shab

azm-e-shikast-e-māh-jabīnāñ liye hue

dars-e-sukūn-o-sabr ba-īñ ehtamām-e-nāz

nishtar-zanī-e-jumbish-e-mizhgāñ liye hue

āñkhoñ se ek rau sī nikaltī huī har aan

ġharqābī-e-hayāt kā sāmāñ liye hue

hiltī huī nigāh meñ bijlī bharī huī

khilte hue laboñ meñ gulistāñ liye hue

ye kaun hai 'majāz' se sar-garm-e-guftugū

donoñ hatheliyoñ pe zanaḳhdāñ liye hue

ye kaun aa gaya ruKH-e-KHandan liye hue

aariz pe rang-o-nur ka tufan liye hue

bimar ke qarib ba-sad-shan-e-ehtiyat

dildari-e-nasim-e-bahaaran liye hue

ruKHsar par latif si ek mauj-e-sar-KHushi

lab par hansi ka narm sa tufan liye hue

peshani-e-jamil pe anwar-e-tamkanat

tabindagi-e-subh-e-daraKHshan liye hue

zulfon ke pech-o-KHam mein bahaaren chhupi hui

ek karwan-e-nikhat-e-bustan liye hue

aa hi gaya wo mera nigar-e-nazar-nawaz

zulmat-kade mein sham-e-farozan liye hue

ek ek ada mein saikaDon pahlu-e-dildahi

ek ek nazar mein pursish-e-pinhan liye hue

mere sawad-e-shauq ka KHurshid-e-nim-shab

azm-e-shikast-e-mah-jabinan liye hue

dars-e-sukun-o-sabr ba-in ehtamam-e-naz

nishtar-zani-e-jumbish-e-mizhgan liye hue

aankhon se ek rau si nikalti hui har aan

gharqabi-e-hayat ka saman liye hue

hilti hui nigah mein bijli bhari hui

khilte hue labon mein gulistan liye hue

ye kaun hai 'majaz' se sar-garm-e-guftugu

donon hatheliyon pe zanaKHdan liye hue