ayodhya! main aa raha hun

ayodhya! aa rahā huuñ maiñ

maiñ terī kokh se janmā

tirī godī kā paalā huuñ

tirī sadiyoñ purānī sāñvlī miTTī meñ khelā huuñ

mujhe ma.alūm hai tū mujh se rūThī hai

magar ab duur tujh se rah nahīñ saktā

parā.e desh meñ guzrī hai jo mujh par

vo ḳhud se bhī kabhī maiñ kah nahīñ saktā

zarā sar to uThā aur dekh

kitnī duur se tujh ko manāne aa rahā huuñ maiñ

tujhe tere hī kuchh qisse sunāne aa rahā huuñ maiñ

ayodhya! jāntā huuñ terī miTTī meñ udāsī hai

na jaane kitnī sadiyoñ se

mirī bhī ruuh pyāsī hai

ki ham donoñ kī qismat meñ ḳhushī to bas zarā sī hai

bahut din ho ga.e haiñ mujh ko tere āsmāñ dekhe

sunahrī dhuup dekhe chamchamātī kahkashāñ dekhe

tirī galiyāñ tire bāzār aur tere makāñ dekhe

vo din jo tujh meñ raushan the vo barsoñ se kahāñ dekhe

bichhaḌ kar tujh se jo manzar bhī dekhe rā.egāñ dekhe

magar haañ yaad aayā

ek manzar aur bhī mahfūz hai mujh meñ

havelī ek chhoTī sī aur us meñ niim ke saa.e

ki jis meñ aaj bhī zinda haiñ shāyad mere māñ-jā.e

isī manzar ke pīchhe aur bhī dhuñdle se manzar haiñ

purānī gum-shuda tahzīb ke ghar haiñ

jahāñ ḳhvāboñ kī duniyā haiñ

jahāñ yādoñ ke daftar haiñ

añdhere rū-ba-rū mere

sitāre mere andar haiñ

kahīñ rādhā kahīñ siitā kahīñ byākul sī miirā hai

kahīñ par karbalā hai aur kahīñ par rāmlīlā hai

tirā merā to an-ginat janmoñ kā qissa hai

ki mujh meñ duur

sadiyoñ duur

gautam ab bhī zinda hai

havā ruk ruk ke aatī hai

jo gūñjī thiiñ hazāroñ saal pahle

vo sadā.eñ saath laatī hai

mire andar jo mere ruup haiñ

mujh ko dikhātī hai

ayodhya! meñ tire marghaT kā baasī huuñ

mujhe tū jāntī hogī

mujhe ma.alūm hai mujh ko

mire har naam se pahchāntī hogī

ujaḌ kar rah gayā jo maiñ vo mela huuñ

bharā sansār hai phir bhī akelā huuñ

tirī miTTī se jaagā huuñ

tirī miTTī meñ khelā huuñ

tirī miTTī ko pahnā hai

tirī miTTī ko oḌhā hai

bahut jī chāhtā hai ab tirī miTTī meñ kho jā.ūñ

ka.ī sadiyoñ kā jaagā huuñ

tirī miTTī meñ so jā.ūñ

ayodhya! merā bāhar karbalā hai

andarūñ merā kapilvastu hai, makka hai madīna hai

mujhe tere purāne aur raushan din meñ jiinā hai

badan par hai tirā baḳhshā huā ye kesarī baanā

hai bhikshā patr hāthoñ meñ

safar merā hai ab tārīk rātoñ meñ

ayodhya! sar uThā

aur dekh le mujh ko

thake qadmoñ se ab terī hī jānib aa rahā huuñ maiñ

safar tārīk hai

pag pag pe Thokar khā rahā huuñ maiñ

mujhe āvāz de ghabrā rahā huuñ maiñ

tirī ḳhātir jo barsoñ se chhupā rakkhā hai dil meñ

vo ujālā lā rahā huuñ maiñ

ayodhya!

aa rahā huuñ maiñ

ayodhya! aa raha hun main

main teri kokh se janma

teri godi ka pala hun

teri sadiyon purani sanwli miTTi mein khela hun

mujhe malum hai tu mujh se ruThi hai

magar ab dur tujh se rah nahin sakta

parae desh mein guzri hai jo mujh par

wo KHud se bhi kabhi main kah nahin sakta

zara sar to uTha aur dekh

kitni dur se tujh ko manane aa raha hun main

tujhe tere hi kuchh qisse sunane aa raha hun main

ayodhya! jaanta hun teri miTTi mein udasi hai

na jaane kitni sadiyon se

meri bhi ruh pyasi hai

ki hum donon ki qismat mein KHushi to bas zara si hai

bahut din ho gae hain mujh ko tere aasman dekhe

sunahri dhup dekhe chamchamati kahkashan dekhe

teri galiyan tere bazar aur tere makan dekhe

wo din jo tujh mein raushan the wo barson se kahan dekhe

bichhaD kar tujh se jo manzar bhi dekhe raegan dekhe

magar han yaad aaya

ek manzar aur bhi mahfuz hai mujh mein

haweli ek chhoTi si aur us mein nim ke sae

ki jis mein aaj bhi zinda hain shayad mere man-jae

isi manzar ke pichhe aur bhi dhundle se manzar hain

purani gum-shuda tahzib ke ghar hain

jahan KHwabon ki duniya hain

jahan yaadon ke daftar hain

andhere ru-ba-ru mere

sitare mere andar hain

kahin radha kahin sita kahin byakul si mera hai

kahin par karbala hai aur kahin par ramlila hai

tera mera to an-ginat janmon ka qissa hai

ki mujh mein dur

sadiyon dur

gautam ab bhi zinda hai

hawa ruk ruk ke aati hai

jo gunji thin hazaron sal pahle

wo sadaen sath lati hai

mere andar jo mere rup hain

mujh ko dikhati hai

ayodhya! mein tere marghaT ka basi hun

mujhe tu jaanti hogi

mujhe malum hai mujh ko

mere har nam se pahchanti hogi

ujaD kar rah gaya jo main wo mela hun

bhara sansar hai phir bhi akela hun

teri miTTi se jaga hun

teri miTTi mein khela hun

teri miTTi ko pahna hai

teri miTTi ko oDha hai

bahut ji chahta hai ab teri miTTi mein kho jaun

kai sadiyon ka jaga hun

teri miTTi mein so jaun

ayodhya! mera bahar karbala hai

andarun mera kapilwastu hai, makka hai madina hai

mujhe tere purane aur raushan din mein jina hai

badan par hai tera baKHsha hua ye kesari bana

hai bhiksha patr hathon mein

safar mera hai ab tarik raaton mein

ayodhya! sar uTha

aur dekh le mujh ko

thake qadmon se ab teri hi jaanib aa raha hun main

safar tarik hai

pag pag pe Thokar kha raha hun main

mujhe aawaz de ghabra raha hun main

teri KHatir jo barson se chhupa rakkha hai dil mein

wo ujala la raha hun main

ayodhya!

aa raha hun main