azal-ta-abad

ufuq-tā-ufuq ye dhundalke kā aalam

ye had-e-nazar tak

nam-ālūd sī ret kā narm qālīñ ki jis par

samundar kī chanchal javāñ beTiyoñ ne

kisī naqsh-e-pā ko bhī na chhoḌā

fazā apne dāman meñ bojhal ḳhamoshī sameTe hai lekin

machaltī huī mast lahroñ ke hoñToñ pe naġhma hai raqsāñ

ye naġhma sunā thā mujhe yaad aatā nahīñ kab

magar haañ

bas ehsās hai is qadar qarna-hā qarn pahle

ki ginnā bhī chāhe to koī jinheñ gin na paa.e

bhalā reg-e-sāhil ke phaile hue nanhe zarroñ ko koī kahāñ tak gine

machaltī huī mast lahroñ ko sāhil se chhuTne kā ġham hī nahīñ hai

vidā-e-sukūñ jaise koī sitam hī nahīñ hai

jise qarna-hā-qarn pahle bhī maiñ ne sunā thā

jise log sūraj ke bujhne talak yūñhī sunte raheñge

ufuq-ta-ufuq ye dhundalke ka aalam

ye had-e-nazar tak

nam-alud si ret ka narm qalin ki jis par

samundar ki chanchal jawan beTiyon ne

kisi naqsh-e-pa ko bhi na chhoDa

faza apne daman mein bojhal KHamoshi sameTe hai lekin

machalti hui mast lahron ke honTon pe naghma hai raqsan

ye naghma suna tha mujhe yaad aata nahin kab

magar han

bas ehsas hai is qadar qarna-ha qarn pahle

ki ginna bhi chahe to koi jinhen gin na pae

bhala reg-e-sahil ke phaile hue nanhe zarron ko koi kahan tak gine

machalti hui mast lahron ko sahil se chhuTne ka gham hi nahin hai

wida-e-sukun jaise koi sitam hi nahin hai

jise qarna-ha-qarn pahle bhi main ne suna tha

jise log suraj ke bujhne talak yunhi sunte rahenge