azali masarraton ki azali manzil

maTiyāle maTiyāle bādal ghuum rahe haiñ maidānoñ ke phailāv par

dariyā kī dīvānī maujeñ humak humak kar hans detī haiñ ik naav par

sāmne uude se parbat kī abr-ālūda choTī par hai ek shivālā

jis ke aks kī tābānī se phail rahā hai chāroñ jānib ek ujālā

jhilmil kartī ek mash.al se mehrāboñ ke gahre saa.e raqsīda haiñ

har sū pariyāñ naach rahī haiñ jin ke aariz raḳhshāñ nazreñ duzdīda haiñ

ambar aur lobān kī lahreñ doshīza kī zulfoñ pe aaise bal khātī haiñ

chāñdī ke nāqūs kī tāneñ dhuñdle dhuñdle nazzāroñ meñ ghul jaatī haiñ

haath baḌhā.e sar nihūuḌā.e patle sāyoñ kā ik jhurmuT ghuum rahā hai

puujā kī lazzat meñ kho kar mandir ke tābinda ziine chuum rahā hai

ek bahut patlī pagDanDī sāhil-e-dariyā se mandir tak kaañp rahī hai

naav chalāne vaalī laḌkī chappū ko māthe se lagā.e haañp rahī hai

dīvānī ko kaun batā.e us mandir kī dhun meñ sab thak-hār ga.e haiñ

saa.e ban ke ghuum rahe haiñ jo be-bāk chalāne vaale paar ga.e haiñ

vo jab naav se utregī maTiyāle maTiyāle bādal ghir ā.eñge

maidānoñ par kohsāroñ par dariyā par naav par sab par chhā jā.eñge

avval to pagDanDī kho kar gir jā.egī ġhāroñ ġhāroñ meñ bechārī

bach niklī to ho jā.egī us ke nāzuk dil par ik haibat sī taarī

hosh meñ aa.ī to rag rag par ek nasha sā be-hoshī kā chhāyā hogā

jism ke badle us mandir meñ dhundlā ik lachkīlā saayā hogā

maTiyale maTiyale baadal ghum rahe hain maidanon ke phailaw par

dariya ki diwani maujen humak humak kar hans deti hain ek naw par

samne ude se parbat ki abr-aluda choTi par hai ek shiwala

jis ke aks ki tabani se phail raha hai chaaron jaanib ek ujala

jhilmil karti ek mashal se mehrabon ke gahre sae raqsida hain

har su pariyan nach rahi hain jin ke aariz raKHshan nazren duzdida hain

ambar aur loban ki lahren doshiza ki zulfon pe aaise bal khati hain

chandi ke naqus ki tanen dhundle dhundle nazzaron mein ghul jati hain

hath baDhae sar nihuuDae patle sayon ka ek jhurmuT ghum raha hai

puja ki lazzat mein kho kar mandir ke tabinda zine chum raha hai

ek bahut patli pagDanDi sahil-e-dariya se mandir tak kanp rahi hai

naw chalane wali laDki chappu ko mathe se lagae hanp rahi hai

diwani ko kaun batae us mandir ki dhun mein sab thak-haar gae hain

sae ban ke ghum rahe hain jo be-bak chalane wale par gae hain

wo jab naw se utregi maTiyale maTiyale baadal ghir aaenge

maidanon par kohsaron par dariya par naw par sab par chha jaenge

awwal to pagDanDi kho kar gir jaegi ghaaron ghaaron mein bechaari

bach nikli to ho jaegi us ke nazuk dil par ek haibat si tari

hosh mein aai to rag rag par ek nasha sa be-hoshi ka chhaya hoga

jism ke badle us mandir mein dhundla ek lachkila saya hoga