ba-yaad-e-aKHtar shirani

fazā-e-ishq ko mātam-gusār chhoḌ gayā

jahāñ meñ naqsh-e-vafā yādgār chhoḌ gayā

payām-e-dīda-e-afsāna-kār chhoḌ gayā

hikāyat-e-ḳham-e-gesū-e-yār chhoḌ gayā

nazar meñ ik ḳhalish-e-intizār chhoḌ gayā

jigar meñ ik tapish-e-dard-kār chhoḌ gayā

sunā ke rāh-e-mohabbat meñ naġhma-hā-e-junūñ

qabā-e-lāla-o-gul tār-tār chhoḌ gayā

ufuq ke paar gayā ḳhanda-zan bahāroñ par

chaman ko ġham-zada-o-sogvār chhoḌ gayā

bisāt-e-ḳhāk ko de kar bahār-e-lāla-o-gul

chaman ke siine pe zaḳhm-e-bahār chhoḌ gayā

shab-e-bahār meñ tāroñ kī raushnī ke liye

matā-e-giryā-e-ḳhūñāba-bār chhoḌ gayā

paTak ke jaam zamāne kī be-sabātī par

nishān-e-hastī-e-nā-pā.edār chhoḌ gayā

sharāb-o-sher kī rañgīñ fazā pe lahrā kar

surūd-e-ḳhum-kada-e-nau-bahār chhoḌ gayā

faza-e-ishq ko matam-gusar chhoD gaya

jahan mein naqsh-e-wafa yaadgar chhoD gaya

payam-e-dida-e-afsana-kar chhoD gaya

hikayat-e-KHam-e-gesu-e-yar chhoD gaya

nazar mein ek KHalish-e-intizar chhoD gaya

jigar mein ek tapish-e-dard-kar chhoD gaya

suna ke rah-e-mohabbat mein naghma-ha-e-junun

qaba-e-lala-o-gul tar-tar chhoD gaya

ufuq ke par gaya KHanda-zan bahaaron par

chaman ko gham-zada-o-sogwar chhoD gaya

bisat-e-KHak ko de kar bahaar-e-lala-o-gul

chaman ke sine pe zaKHm-e-bahaar chhoD gaya

shab-e-bahaar mein taron ki raushni ke liye

mata-e-girya-e-KHunaba-bar chhoD gaya

paTak ke jam zamane ki be-sabaati par

nishan-e-hasti-e-na-paedar chhoD gaya

sharab-o-sher ki rangin faza pe lahra kar

surud-e-KHum-kada-e-nau-bahaar chhoD gaya