baad-az-marg

maiñ mar chukā huuñ

aur mujhe pata bhī nahīñ

ab kyā karoge tum

nahlāoge mujhe

aur pūchhoge bhī nahīñ

maiñ nahānā chāhtā huuñ yā nahīñ

ye bhī nahīñ dekhoge

paanī garm hai yā nahīñ

bhuul jāoge ki achchhā nahīñ lagtā

mujhe ThanDā paanī

nahāne ke liye na piine ke liye

phir libās tabdīl karoge merā

aur ye bhī nahīñ pūchhoge

kyā pahannā chāhtā huuñ

kaun sā rañg patlūn qamīz yā kuchh aur

mujh se pūchhe baġhair

tum vo sab kuchh karoge

jo maiñ ne apne saath kabhī nahīñ hone diyā

ek do baar nahīñ saikaḌoñ baar

maiñ ne ḳhud ko intihā.ī be-bas mahsūs kiyā hai

la.anat ho mujh par

maut hai bebasī kī intihā

ye baat mujh par kab khulī hai

mere jism se jald-az-jald

jaan chhuḌā ke

tum lauToge

yā shāyad vahīñ se chale jāoge

shāyad kuchh der bāteñ karoge

mere baare meñ kam

kārobār ke baare meñ

kisī mēting ke baare meñ

yā sports ke baare meñ

yā kisī adākāra ke na.e scandal ke baare meñ

shāyad kuchh khāoge yā shāyad kuchh piyoge

aur ek ek kar ke ruḳhsat ho jāoge

darvāze par ruke baġhair

ye dekhe baġhair

ki maiñ tumheñ ruḳhsat karne aa rahā huuñ

shukriya adā karnā chāhtā huuñ maiñ tumhārā

tamām masrūfiyat ke bāvajūd

itnā vaqt nikālne par

main mar chuka hun

aur mujhe pata bhi nahin

ab kya karoge tum

nahlaoge mujhe

aur puchhoge bhi nahin

main nahana chahta hun ya nahin

ye bhi nahin dekhoge

pani garm hai ya nahin

bhul jaoge ki achchha nahin lagta

mujhe ThanDa pani

nahane ke liye na pine ke liye

phir libas tabdil karoge mera

aur ye bhi nahin puchhoge

kya pahanna chahta hun

kaun sa rang patlun qamiz ya kuchh aur

mujh se puchhe baghair

tum wo sab kuchh karoge

jo main ne apne sath kabhi nahin hone diya

ek do bar nahin saikaDon bar

main ne KHud ko intihai be-bas mahsus kiya hai

lanat ho mujh par

maut hai bebasi ki intiha

ye baat mujh par kab khuli hai

mere jism se jald-az-jald

jaan chhuDa ke

tum lauToge

ya shayad wahin se chale jaoge

shayad kuchh der baaten karoge

mere bare mein kam

karobar ke bare mein

kisi meeting ke bare mein

ya sports ke bare mein

ya kisi adakara ke nae scandal ke bare mein

shayad kuchh khaoge ya shayad kuchh piyoge

aur ek ek kar ke ruKHsat ho jaoge

darwaze par ruke baghair

ye dekhe baghair

ki main tumhein ruKHsat karne aa raha hun

shukriya ada karna chahta hun main tumhaara

tamam masrufiyat ke bawajud

itna waqt nikalne par