baadal jhuk aae the

bādal jhuk aa.e the

aamoñ kī Daalī ke nīche kachchī miTTī soī huī thī

tez havā se patte nīche girte the

maiñ tanhā peḌ ke paas khaḌā thā

soch rahā thā ruḳhsat aisī hotī hai

sab kuchh dil kī handī meñ se bāhar aa kar

be-ḳhushbū ke phuul kī sūrat ho jaatā hai

rāheñ taktī sapne sotī āñkheñ

aañsū bhar kar collar pe aa jaatī haiñ

meñh ke pardoñ meñ se dil kī miTTī

apne bojhal suḳhnoñ ke paanī meñ dhul kar

pal ke pal anjān havā meñ kho jaatī hai

shaam kī bāñheñ dastak ban kar aatī haiñ

aur ḳhud hī apne aap havā kī lahroñ meñ kho jaatī haiñ

koī nahīñ hai

dil ne apne saare kāġhaz thaam liye haiñ

meñh kī būñdeñ jin pe girtī rahtī haiñ

baadal jhuk aae the

aamon ki Dali ke niche kachchi miTTi soi hui thi

tez hawa se patte niche girte the

main tanha peD ke pas khaDa tha

soch raha tha ruKHsat aisi hoti hai

sab kuchh dil ki handi mein se bahar aa kar

be-KHushbu ke phul ki surat ho jata hai

rahen takti sapne soti aankhen

aansu bhar kar collar pe aa jati hain

meinh ke pardon mein se dil ki miTTi

apne bojhal suKHnon ke pani mein dhul kar

pal ke pal anjaan hawa mein kho jati hai

sham ki banhen dastak ban kar aati hain

aur KHud hi apne aap hawa ki lahron mein kho jati hain

koi nahin hai

dil ne apne sare kaghaz tham liye hain

meinh ki bunden jin pe girti rahti hain