baadh

naddī kī lahreñ

sote sote

jaise ek dam jaag paḌīñ

aur jhapaT paḌīñ

in giile giile

miTTī baalū kañkar

patthar aur cement ke

pushtoñ par

jin se un ko bāñdh ke

sab ne rakh chhoḌā thā

lahak lahak kar

naach naach kar

shor machātī

chāroñ or

galī galī kūche kūche meñ

gharoñ meñ sehnoñ meñ kamroñ bāġhoñ meñ

kone kone meñ vo

jhaT-paT

ghus aa.iiñ

chaḌh-dauḌīñ

koī chiiz na chhūTī un se

bartan, bāsan,

zevar, kapḌe

kursī, mez,

kitābeñ

bhūle-bisre

ḳhat pattar

tasvīreñ

dastāvezeñ

tahrīreñ

bekār paḌī chīzeñ

vo jin ke hone kā bhī pata na thā

lahroñ ne un ko gher liyā

dāman meñ apne

bheñch liyā

kīchaḌ miTTī meñ lat-pat kar Daalā

aur sab kuchh le kar Duub ga.īñ!

phir jaise ik-dam aa.ī thīñ,

vaise hī har har kartī

bal khātī, iThlātī,

nikal ga.iiñ

2

ai kāsh, diloñ meñ rūhoñ meñ

aisī ik chanchal baaḌh aa.e

bekār Daroñ ke Dheroñ par

himmat kī lahreñ bikhrā de

ḳhud-ġharzī ke sandūqoñ ko

ik jhaTkā de kar ulTā de

phāḌe lālach kī poToñ ko

jāloñ ko jahl o shaqāvat ke

aur zulm kī gandī makḌī ko

chiknī kālakh ko ta.assub kī

nābūd kare nāpaid kare

yuuñ nam kar de dil kī khetī

ummīdeñ sab lahrā uTTheñ

gulnār shagūfe ulfat ke

sūkhī jānoñ se phuuT paḌeñ

ai kaash diloñ meñ rūhoñ meñ

aisī ik chanchal baaḌh aa.e

naddi ki lahren

sote sote

jaise ek dam jag paDin

aur jhapaT paDin

in gile gile

miTTi baalu kankar

patthar aur cement ke

pushton par

jin se un ko bandh ke

sab ne rakh chhoDa tha

lahak lahak kar

nach nach kar

shor machati

chaaron or

gali gali kuche kuche mein

gharon mein sehnon mein kamron baghon mein

kone kone mein wo

jhaT-paT

ghus aain

chaDh-dauDin

koi chiz na chhuTi un se

bartan, basan,

zewar, kapDe

kursi, mez,

kitaben

bhule-bisre

KHat pattar

taswiren

dastawezen

tahriren

bekar paDi chizen

wo jin ke hone ka bhi pata na tha

lahron ne un ko gher liya

daman mein apne

bhench liya

kichaD miTTi mein lat-pat kar Dala

aur sab kuchh le kar Dub gain!

phir jaise ik-dam aai thin,

waise hi har har karti

bal khati, iThlati,

nikal gain

2

ai kash, dilon mein ruhon mein

aisi ek chanchal baDh aae

bekar Daron ke Dheron par

himmat ki lahren bikhra de

KHud-gharzi ke sanduqon ko

ek jhaTka de kar ulTa de

phaDe lalach ki poTon ko

jalon ko jahl o shaqawat ke

aur zulm ki gandi makDi ko

chikni kalakh ko tassub ki

nabud kare napaid kare

yun nam kar de dil ki kheti

ummiden sab lahra uTThen

gulnar shagufe ulfat ke

sukhi jaanon se phuT paDen

ai kash dilon mein ruhon mein

aisi ek chanchal baDh aae