banjh

chhatoñ muñDeroñ aur peḌoñ par

Dhaltī dhuup ke ujle kapḌe suukh rahe the

bādal surḳh sī jhālar vaale bāñke bādal

hañste chahakte phūloñ kā ik guldasta the

har shai kundan ruup meñ Dhal kar damak rahī thī

gāloñ par sone kī Dalag aur āñkhoñ meñ ik tez chamak thī

saarā manzar kaif ke ik lamhe meñ bebas

lazzat kī bāñhoñ meñ jakḌā humak rahā thā

aur phir do āñkhoñ ko miltī

kaale uljhe bāloñ ko mukh par bikhrā.e

chhoTe chhoTe qadam uThātī baḌhtī aa.ī

pahlī khiḌkī meñ jab us ne jhāñkā

khiḌkī kī dahlīz pe rakkhā ik nāzuk gul-dān chaTaḳh kar TuuT gayā

uljhe bāloñ pāgal āñkhoñ vaalī ne tab aage baḌh kar

dūsrī tīsrī aur phir galī kī har khiḌkī meñ jhāñk ke dekhā

gul-dānoñ ko Thokar maarī

ik ik phuul ko rauñd diyā

tab vo mujh ko dekh ke lapkī

merī jānib ġhaiz-bharī nazroñ kā relā aayā

phir jaise kuchh shoḳh ke ThiThkī

surḳh gulāb kā phuul mire hāthoñ meñ thamāyā

aur ḳhud chikne farsh pe gir kar TuuT ga.ī

chhaton munDeron aur peDon par

Dhalti dhup ke ujle kapDe sukh rahe the

baadal surKH si jhaalar wale banke baadal

hanste chahakte phulon ka ek guldasta the

har shai kundan rup mein Dhal kar damak rahi thi

galon par sone ki Dalag aur aankhon mein ek tez chamak thi

sara manzar kaif ke ek lamhe mein bebas

lazzat ki banhon mein jakDa humak raha tha

aur phir do aankhon ko milti

kale uljhe baalon ko mukh par bikhrae

chhoTe chhoTe qadam uThati baDhti aai

pahli khiDki mein jab us ne jhanka

khiDki ki dahliz pe rakkha ek nazuk gul-dan chaTaKH kar TuT gaya

uljhe baalon pagal aankhon wali ne tab aage baDh kar

dusri tisri aur phir gali ki har khiDki mein jhank ke dekha

gul-danon ko Thokar mari

ek ek phul ko raund diya

tab wo mujh ko dekh ke lapki

meri jaanib ghaiz-bhari nazron ka rela aaya

phir jaise kuchh shoKH ke ThiThki

surKH gulab ka phul mere hathon mein thamaya

aur KHud chikne farsh pe gir kar TuT gai