bapu

shohrat hai terī baapū har sū mire vatan meñ

terā hī tazkira hai duniyā kī anjuman meñ

tū phuul ban ke mahkā kuchh is tarah chaman meñ

ḳhushbū samā ga.ī hai afsurda jān-o-tan meñ

tū sadr-e-anjuman hai tū nāzish-e-vatan hai

tū rang-e-dilbarī hai tū nik.hat-e-chaman hai

tujh ko thī misl-e-īmāñ apne vatan se ulfat

aḳhlāq se miTā.ī tū ne binā-e-nafrat

maz.hab thā sirf terā ḳhalq-e-ḳhudā kī ḳhidmat

ai qaum ke masīhā ai faḳhr-e-ādamiyyat

terā karam hai kitnā bhārat kī sar-zamīñ par

azmat kī raushnī hai ab hind kī zamīñ par

jāh-o-hasham kā lālach dil meñ kabhī na aayā

jo dūsroñ se chāhā vo kar ke ḳhud dikhāyā

chhoTe baḌe kī tū ne tafrīq ko miTāyā

insāniyat kā paiham sab ko sabaq paḌhāyā

tere zabān-o-dil meñ thā ek rabt-e-sādiq

tū adl kā pujārī rūhāniyat kā āshiq

saare chaman meñ raqsāñ hai aaj husn-e-fitrat

kaliyoñ meñ hai mohabbat phūloñ meñ hai uḳhuvvat

tū ne vatan ko baḳhshī husn-e-yaqīñ kī daulat

tū ne banā diyā hai bhārat ko misl-e-jannat

ye inqalāb aayā tere hī fikr-o-fan se

āzād ham hue haiñ baapū tirī lagan se

shohrat hai teri bapu har su mere watan mein

tera hi tazkira hai duniya ki anjuman mein

tu phul ban ke mahka kuchh is tarah chaman mein

KHushbu sama gai hai afsurda jaan-o-tan mein

tu sadr-e-anjuman hai tu nazish-e-watan hai

tu rang-e-dilbari hai tu nikhat-e-chaman hai

tujh ko thi misl-e-iman apne watan se ulfat

aKHlaq se miTai tu ne bina-e-nafrat

mazhab tha sirf tera KHalq-e-KHuda ki KHidmat

ai qaum ke masiha ai faKHr-e-adamiyyat

tera karam hai kitna bhaarat ki sar-zamin par

azmat ki raushni hai ab hind ki zamin par

jah-o-hasham ka lalach dil mein kabhi na aaya

jo dusron se chaha wo kar ke KHud dikhaya

chhoTe baDe ki tu ne tafriq ko miTaya

insaniyat ka paiham sab ko sabaq paDhaya

tere zaban-o-dil mein tha ek rabt-e-sadiq

tu adl ka pujari ruhaniyat ka aashiq

sare chaman mein raqsan hai aaj husn-e-fitrat

kaliyon mein hai mohabbat phulon mein hai uKHuwwat

tu ne watan ko baKHshi husn-e-yaqin ki daulat

tu ne bana diya hai bhaarat ko misl-e-jannat

ye inqalab aaya tere hi fikr-o-fan se

aazad hum hue hain bapu teri lagan se