baqist shab-e-fitna

añdhere meñ chalā hai kārvān-e-be-jaras koī

buland-o-past koī hai na us kā pesh-o-pas koī

faqat āvāz-e-pā-e-rahravāñ hai ham-safar apnī

sharīk-e-kārvāñ kitne haiñ kitne ham-safar haiñ kaun rahbar kaun rahzan hai

kahāñ par kaun hai kis kunj meñ kis kā baserā hai

ḳhudā jaane yahāñ to bas añdherā hī añdherā hai

kuchh āvāzeñ haiñ

āvāzoñ ke dekho jism bhī haiñ pairahan bhī haiñ

inhīñ meñ tum bhī ho maiñ bhī

maiñ kyā huuñ tum mirī āvāz kā chehra banā kar dekh lo

yahī maiñ kar rahā huuñ sab yahī karte haiñ

ye kaise batā.ūñ chal rahā huuñ kab se

merī ibtidā zulmat hai tum chāho to is ko intihā kah lo

ta.ayyun samt kā kaise ho kyā ta.adīd-e-sā.at ho

ab aise meñ batāo kaise tahdīd-e-masāfat ho

chalo chalte raho

koī āvāz kyuuñ aatī nahīñ

murdoñ pe shāyad chal rahe haiñ ham

yahāñ rukne se pahle soch lo

kuchh āhaTeñ pīchhe bhī haiñ apne

vo ham ko rauñd jā.eñgī

chalo chalte raho

koī Tāñkā kahīñ TuuTā hai sannāTe ke hoñToñ kā

ye koī chīḳh hai samjho kahīñ par mar gayā koī

kisī uftāda dil par paañv shāyad dhar gayā koī

chalo chalte raho

koī sūraj kisī kī āstīñ se phir hameñ āvāz detā hai

aur is āvāz se had-e-nazar tak raushnī sī hai

koī sūraj koī mash.al

koī jugnū koī taarā

koī āvāz koī chīḳh

kuchh bhī ho sabhī marte haiñ

lekin marte marte raushnī kī guuñj ban jaate haiñ

aao guuñj se jhaḌte sharāroñ ko sameTeñ

un ke resham se mulā.em tiir sīnoñ meñ chhupā leñ

zaḳhm kar leñ dil ko

aur phir zaḳhm se gul gul se naġhmoñ kī laveñ māñgeñ

phir un ko jab talak chalnā hai koī naam de leñ

ḳhvāb kah leñ yā haqīqat

ye safar hai aur añdherā mustaqil hai

apnī āvāzoñ ko apnā ham-safar kar leñ

chalo chalte raho

vo rah-rav saañs jis kī chhū rahī hai merī aahaT ko

nahīñ vo tum nahīñ ho

merī parchhā.īñ hai

tum bhī apnī parchhā.īñ koī taḳhlīq kar lo

kārvāñ tum bhī ho aur maiñ bhī

ham apnī apnī zulmat apnī apnī raushnī ḳhud haiñ

luTe jitnā koī us ke liye itnā añdherā hai!

andhere mein chala hai karwan-e-be-jaras koi

buland-o-past koi hai na us ka pesh-o-pas koi

faqat aawaz-e-pa-e-rahrawan hai ham-safar apni

sharik-e-karwan kitne hain kitne ham-safar hain kaun rahbar kaun rahzan hai

kahan par kaun hai kis kunj mein kis ka basera hai

KHuda jaane yahan to bas andhera hi andhera hai

kuchh aawazen hain

aawazon ke dekho jism bhi hain pairahan bhi hain

inhin mein tum bhi ho main bhi

main kya hun tum meri aawaz ka chehra bana kar dekh lo

yahi main kar raha hun sab yahi karte hain

ye kaise bataun chal raha hun kab se

meri ibtida zulmat hai tum chaho to is ko intiha kah lo

tayyun samt ka kaise ho kya tadid-e-saat ho

ab aise mein batao kaise tahdid-e-masafat ho

chalo chalte raho

koi aawaz kyun aati nahin

murdon pe shayad chal rahe hain hum

yahan rukne se pahle soch lo

kuchh aahaTen pichhe bhi hain apne

wo hum ko raund jaengi

chalo chalte raho

koi Tanka kahin TuTa hai sannaTe ke honTon ka

ye koi chiKH hai samjho kahin par mar gaya koi

kisi uftada dil par panw shayad dhar gaya koi

chalo chalte raho

koi suraj kisi ki aastin se phir hamein aawaz deta hai

aur is aawaz se had-e-nazar tak raushni si hai

koi suraj koi mashal

koi jugnu koi tara

koi aawaz koi chiKH

kuchh bhi ho sabhi marte hain

lekin marte marte raushni ki gunj ban jate hain

aao gunj se jhaDte shararon ko sameTen

un ke resham se mulaem tir sinon mein chhupa len

zaKHm kar len dil ko

aur phir zaKHm se gul gul se naghmon ki lawen mangen

phir un ko jab talak chalna hai koi nam de len

KHwab kah len ya haqiqat

ye safar hai aur andhera mustaqil hai

apni aawazon ko apna ham-safar kar len

chalo chalte raho

wo rah-raw sans jis ki chhu rahi hai meri aahaT ko

nahin wo tum nahin ho

meri parchhain hai

tum bhi apni parchhain koi taKHliq kar lo

karwan tum bhi ho aur main bhi

hum apni apni zulmat apni apni raushni KHud hain

luTe jitna koi us ke liye itna andhera hai!