barahwan khilaDi

ḳhush-gavār mausam meñ

an-ginat tamāshā.ī

apnī apnī teamoñ ko

daad dene aate haiñ

apne apne pyāroñ kā

hausla baḌhāte haiñ

maiñ alag-thalag sab se

bārahveñ khilāḌī ko

hoot kartā rahtā huuñ

bārahvāñ khilāḌī bhī

kyā ajab khilāḌī hai

khel hotā rahtā hai

shor machtā rahtā hai

daad paḌtī rahtī hai

aur vo alag sab se

intizār kartā hai

ek aisī saa.at kā

ek aise lamhe kā

jis meñ sāneha ho jaa.e

phir vo khelne nikle

tāliyoñ ke jhurmuT meñ

ek jumla-e-ḳhush-kun

ek nāra-e-tahsīn

us ke naam par ho jaa.e

sab khilāḌiyoñ ke saath

vo bhī mo'atabar ho jaa.e

par ye kam hī hotā hai

phir bhī log kahte haiñ

khel se khilāḌī kā

umr-bhar kā rishta hai

umr-bhar kā ye rishta

chhūT bhī to saktā hai

āḳhirī whistle ke saath

Duub jaane vaalā dil

TuuT bhī to saktā hai

tum bhī iftiḳhār-ārif

bārahveñ khilāḌī ho

intizār karte ho

ek aise lamhe kā

ek aisī saa.at kā

jis meñ hādisa ho jaa.e

jis meñ sāneha ho jaa.e

tum bhī iftiḳhār-ārif

tum bhī Duub jāoge

tum bhī TuuT jāoge

KHush-gawar mausam mein

an-ginat tamashai

apni apni teamon ko

dad dene aate hain

apne apne pyaron ka

hausla baDhate hain

main alag-thalag sab se

barahwen khilaDi ko

hoot karta rahta hun

barahwan khilaDi bhi

kya ajab khilaDi hai

khel hota rahta hai

shor machta rahta hai

dad paDti rahti hai

aur wo alag sab se

intizar karta hai

ek aisi saat ka

ek aise lamhe ka

jis mein saneha ho jae

phir wo khelne nikle

taliyon ke jhurmuT mein

ek jumla-e-KHush-kun

ek nara-e-tahsin

us ke nam par ho jae

sab khilaDiyon ke sath

wo bhi mo'atabar ho jae

par ye kam hi hota hai

phir bhi log kahte hain

khel se khilaDi ka

umr-bhar ka rishta hai

umr-bhar ka ye rishta

chhuT bhi to sakta hai

aaKHiri whistle ke sath

Dub jaane wala dil

TuT bhi to sakta hai

tum bhi iftiKHar-arif

barahwen khilaDi ho

intizar karte ho

ek aise lamhe ka

ek aisi saat ka

jis mein hadisa ho jae

jis mein saneha ho jae

tum bhi iftiKHar-arif

tum bhi Dub jaoge

tum bhi TuT jaoge