baz-gasht

maiñ terī bastī se bhaag kar duur ik ḳharābe meñ aa gayā huuñ

ye vo ḳharāba hai jis meñ hastī kī raushnī kā guzar nahīñ hai

yahāñ na tū hai na rañg-o-bū hai na zindagī hai

yahāñ hai vo ālam-e-ḳhamoshī ki dil kī dhaḌkan bhī be-sadā hai

ki merī tanhā.iyoñ ke dāman-e-ufuq ke dāman se jā mile haiñ

tire nagar ke hasīn kūche shafīq galiyāñ jo ziist kī raushnī kā ghar haiñ

mire liye merī bebasī ne inheñ shab-ālūd kar diyā hai

vo rahguzar tere naqsh-e-pā par jahāñ hazār āstāñ bane haiñ

vo rahguzar ajnabī hue haiñ

jahāñ maiñ ab huuñ vahāñ agarche hai be-karāñ tīrgī fazā meñ

magar yahāñ bhī mire ḳhayāloñ meñ mahr ban kar tirā sarāpā damak rahā hai

havā ke be-kaif sard jhoñke jo zard pattoñ se khelte haiñ

to merī be-āb ḳhushk āñkheñ tujhe ḳhalāoñ meñ DhūñDhtī haiñ

mirā taḳhayyul ki is ḳharābe se bad-gumāñ hai

mire junūñ ko jhiñjhoḌtā hai to sochtā huuñ

agarche tū ek vo haqīqat hai jis kā iqrār lā-budī hai

magar ye terā vajūd mere liye faqat ek vāhima hai

ki terī zulfoñ ko mere shānoñ ne apnī duniyā se duur paayā

ki mere ashkoñ ko tere dāman kī aarzū hī rahī hamesha

magar ye ḳhush thā

ki mere ġham ne tire taḳhayyul meñ vo sitāre se bhar diye the

charāġh jin ke na bujh sake haiñ na bujh sakeñge

ye sab thā lekin junūñ pe kuchh aisī qadġhaneñ thiiñ

ki jazb-e-dil harf-e-mudda.ā ko na pā sakā thā

kabhī koī dard lafz bin kar marī zabāñ par na aa sakā thā

magar na jaane vo kyā thā jis ne diloñ ke parde uThā diye the

junūñ ke asrār vāqiye the

tahī-zabāñ ham hue the lekin zabāñ ke muhtāj kab rahe the

ki ham nigāhoñ se dil ke paiġhām bhejte the

ye sab thā lekin maiñ karb-e-jāñ-soz kā amiiñ thā

vo karb-e-jāñ-soz thā ki merī hayāt se niiñd bad-gumāñ thī

aur is ḳharābe meñ jis meñ hastī kī raushnī kā guzar nahīñ hai

jahāñ na tū hai na rañg-o-bū hai na zindagī hai

mirā gumāñ thā yahāñ tujhe ḳhud se duur pā kar maiñ karb se jaañ bachā sakūñgā

tujhe kabhī to dimāġh-o-dil se haTā sakūñgā

tujhe kabhī to bhulā sakūñgā

magar ye ik aur vāhima thā

qayāmateñ soz-e-dard-e-dil meñ nihāñ vahī haiñ

abas ġham-e-zindagī se maiñ ne farār chāhā

isī tarah karab-e-jāñ-guzā se maiñ ab bhī ātish-e-ba-jā huuñ har-dam

ki ab tirā shahr chhoḌne kā ik aur ġham hai

agarche terā vajūd mere liye faqat ek vāhima thā

agarche terā vajūd mere liye faqat ek vāhima hai

magar tirā paikar-e-misālī mire ḳhayāloñ meñ jāguzīñ hai

ki vo kisī dil-kushā haqīqat kā bhī amiiñ hai

aur us se mujh ko mafar nahīñ hai

maiñ sochtā huuñ ki us ḳharābe se lauT jā.ūñ

jahāñ na tū hai na rañg-o-bū hai na zindagī hai

jahāñ mujhe aaj ye bhī ġham hai

ki maiñ ne shahr-e-habīb chhoḌā

vafā se maiñ ne vafā nahīñ kī

maiñ sochtā huuñ ki us ḳharābe se lauT jā.ūñ

vahīñ jahāñ maiñ ne zindagī kā sukūn DhūñDā

magar na paayā

vahīñ jahāñ maiñ ne raushnī ke sarāb dekhe

haqīqatoñ par naqāb dekhe

vahīñ jahāñ maiñ ne rāhatoñ ke habāb dekhe

vahīñ milegā sukūñ agar mujh ko zindagī meñ kahīñ milegā

magar ye ik ḳhauf merā dāman isī ḳharābe se bāñdhtā hai

ki is jagah phir agar junūñ ne sukūñ na paayā to kyā karūñgā

main teri basti se bhag kar dur ek KHarabe mein aa gaya hun

ye wo KHaraba hai jis mein hasti ki raushni ka guzar nahin hai

yahan na tu hai na rang-o-bu hai na zindagi hai

yahan hai wo aalam-e-KHamoshi ki dil ki dhaDkan bhi be-sada hai

ki meri tanhaiyon ke daman-e-ufuq ke daman se ja mile hain

tere nagar ke hasin kuche shafiq galiyan jo zist ki raushni ka ghar hain

mere liye meri bebasi ne inhen shab-alud kar diya hai

wo rahguzar tere naqsh-e-pa par jahan hazar aastan bane hain

wo rahguzar ajnabi hue hain

jahan main ab hun wahan agarche hai be-karan tirgi faza mein

magar yahan bhi mere KHayalon mein mahr ban kar tera sarapa damak raha hai

hawa ke be-kaif sard jhonke jo zard patton se khelte hain

to meri be-ab KHushk aankhen tujhe KHalaon mein DhunDhti hain

mera taKHayyul ki is KHarabe se bad-guman hai

mere junun ko jhinjhoDta hai to sochta hun

agarche tu ek wo haqiqat hai jis ka iqrar la-budi hai

magar ye tera wajud mere liye faqat ek wahima hai

ki teri zulfon ko mere shanon ne apni duniya se dur paya

ki mere ashkon ko tere daman ki aarzu hi rahi hamesha

magar ye KHush tha

ki mere gham ne tere taKHayyul mein wo sitare se bhar diye the

charagh jin ke na bujh sake hain na bujh sakenge

ye sab tha lekin junun pe kuchh aisi qadghanen thin

ki jazb-e-dil harf-e-muddaa ko na pa saka tha

kabhi koi dard lafz bin kar mari zaban par na aa saka tha

magar na jaane wo kya tha jis ne dilon ke parde uTha diye the

junun ke asrar waqiye the

tahi-zaban hum hue the lekin zaban ke muhtaj kab rahe the

ki hum nigahon se dil ke paigham bhejte the

ye sab tha lekin main karb-e-jaan-soz ka amin tha

wo karb-e-jaan-soz tha ki meri hayat se nind bad-guman thi

aur is KHarabe mein jis mein hasti ki raushni ka guzar nahin hai

jahan na tu hai na rang-o-bu hai na zindagi hai

mera guman tha yahan tujhe KHud se dur pa kar main karb se jaan bacha sakunga

tujhe kabhi to dimagh-o-dil se haTa sakunga

tujhe kabhi to bhula sakunga

magar ye ek aur wahima tha

qayamaten soz-e-dard-e-dil mein nihan wahi hain

abas gham-e-zindagi se main ne farar chaha

isi tarah karab-e-jaan-guza se main ab bhi aatish-e-ba-ja hun har-dam

ki ab tera shahr chhoDne ka ek aur gham hai

agarche tera wajud mere liye faqat ek wahima tha

agarche tera wajud mere liye faqat ek wahima hai

magar tera paikar-e-misali mere KHayalon mein jaguzin hai

ki wo kisi dil-kusha haqiqat ka bhi amin hai

aur us se mujh ko mafar nahin hai

main sochta hun ki us KHarabe se lauT jaun

jahan na tu hai na rang-o-bu hai na zindagi hai

jahan mujhe aaj ye bhi gham hai

ki main ne shahr-e-habib chhoDa

wafa se main ne wafa nahin ki

main sochta hun ki us KHarabe se lauT jaun

wahin jahan main ne zindagi ka sukun DhunDa

magar na paya

wahin jahan main ne raushni ke sarab dekhe

haqiqaton par naqab dekhe

wahin jahan main ne rahaton ke habab dekhe

wahin milega sukun agar mujh ko zindagi mein kahin milega

magar ye ek KHauf mera daman isi KHarabe se bandhta hai

ki is jagah phir agar junun ne sukun na paya to kya karunga