babul ke daraKHt se kaho

babūl ke daraḳht se kaho

abhī mashām-e-jāñ meñ har siñghār kī shaguftagī

baḌe hī inhimāk se bahār-pāsh hai yahāñ

jo muḌ ke dekhtā huuñ adh-jale gulāb kā badan

shahādatoñ ke ramz par siñghār bhī luTā gayā

jo muḌ ke dekhtā huuñ fāḳhta kā ahmarīñ lahū

jabīn-e-jaur kī sabhī ra.ūnateñ miTā gayā

mire ḳhilāf sāzishoñ kā ye muhīb silsila

mirī anā ke bāñkpan meñ daf.atan samā gayā

chīnār ke daraḳht se hai nāriyal ke peḌ tak

ravāñ davāñ hamārī ḳhushbuoñ kā shoḳh silsila

kabūtaroñ ke ġhol kī phaban hiran kī chaukḌī

havā ke dosh-e-maġhzār ko dulhan banā ga.ī

abhī mirī zamīn kī fazā.eñ sub.h-e-fām haiñ

dhueñ ke naag se kaho

baḌī hī saḳht-jān haiñ hamārī vādiyoñ meñ rañg-o-nūr kī latāfateñ

samundaroñ kī sīpiyoñ se pokharoñ kī ghoghiyoñ ne

bai.atoñ ke vāste sipurd kab kiyā hai ġhairatoñ ke lāla-zār ko

abhī hisār-e-sañg meñ kañval ke phuul haiñ khile

zabān-e-reg-e-surḳh se kaho

hamāre paañv jal ga.e to kyā huā

bahār-e-sabz ke liye zamīñ to aaj mil ga.ī

babul ke daraKHt se kaho

abhi masham-e-jaan mein har singhaar ki shaguftagi

baDe hi inhimak se bahaar-pash hai yahan

jo muD ke dekhta hun adh-jale gulab ka badan

shahadaton ke ramz par singhaar bhi luTa gaya

jo muD ke dekhta hun faKHta ka ahmarin lahu

jabin-e-jaur ki sabhi raunaten miTa gaya

mere KHilaf sazishon ka ye muhib silsila

meri ana ke bankpan mein dafatan sama gaya

chinar ke daraKHt se hai nariyal ke peD tak

rawan dawan hamari KHushbuon ka shoKH silsila

kabutaron ke ghol ki phaban hiran ki chaukDi

hawa ke dosh-e-maghzar ko dulhan bana gai

abhi meri zamin ki fazaen subh-e-fam hain

dhuen ke nag se kaho

baDi hi saKHt-jaan hain hamari wadiyon mein rang-o-nur ki latafaten

samundaron ki sipiyon se pokharon ki ghoghiyon ne

baiaton ke waste sipurd kab kiya hai ghairaton ke lala-zar ko

abhi hisar-e-sang mein kanwal ke phul hain khile

zaban-e-reg-e-surKH se kaho

hamare panw jal gae to kya hua

bahaar-e-sabz ke liye zamin to aaj mil gai