bachchon ka KHat chacha KHarru shechof aur mamun candy

ai chachā ḳharrū shichof ai māmūñ candy assalām

ek hī ḳhat hai ye māmūñ aur chachā donoñ ke naam

aap donoñ kā adab karnā hamārā farz hai

phir bhī sun liije jo chhoTī sī hamārī arz hai

aap donoñ haiñ bahādur sūrmā kyā is meñ shak

ek bādal kī garaj hai ek sho.ale kī lapak

aap donoñ ke bayāñ sun sun ke Dar jaate haiñ ham

dham se aa girte haiñ ham bachchoñ pe ye lafzoñ ke bam

Dar ke chhup jaate haiñ apnī maaoñ ke āġhosh meñ

kaash ham behosh ho kar phir na aa.eñ hosh meñ

aap donoñ laḌ paḌe to jaane kyā ho jā.egā

do minute meñ is jahāñ kā ḳhātma ho jā.egā

aag lag jā.egī is duniyā ko mar jā.eñge sab

jo bayāñ dete haiñ vo ḳhāmosh ho jā.eñge lab

do minute zinda raheñge ham bhī marne ke liye

kaun phir baaqī rahegā raaj karne ke liye

aisā lagtā hai ki kuchh din aur jiinā hai muhāl

gar nahīñ apnā to bachchoñ hī kā kuchh kiije ḳhayāl

ik taraf nafrat khaḌī hai dūsrī jānib ġhurūr

qahr kī chakkī meñ pis jaa.eñ na bachche be-qusūr

le chuke haiñ aap to jī bhar ke duniyā ke maze

ham ko in se duur rakhnā chāhte haiñ kis liye

gar ijāzat ho to ham bachche bhī duniyā dekh leñ

chaar din ham bhī ye bhālū kā tamāshā dekh leñ

kuchh bhī to schōl aur ghar ke sivā dekhā nahīñ

aap kahiye aap ne duniyā meñ kyā dekhā nahīñ

jañg mat kiije na duniyā kī imārat Dhā.iye

sochiye kuchh ġhaur kiije dekhiye baaz aa.iye

aap ne duniyā sajā.ī thī miTāne ke liye

aql kī sham.eñ jalā.ī thiiñ bujhāne ke liye

ilm-o-hikmat science ne kī thī taraqqī ke liye

aql kī sham.eñ jalā.ī thiiñ bujhāne ke liye

ilm-o-hikmat science ne kī thī taraqqī kis liye

nīst-o-nābūd aaj ham kar deñ use kyā is liye

ham ne maanā aap kā aapas meñ hai kuchh iḳhtilāf

ik jagah ham baiTh kar kar leñ na kyuuñ dil apne saaf

apnī is duniyā kī hālat is qadar jab zaar hai

is ko dekheñ chāñd meñ jaanā abhī be-kār hai

duur kiije dil se nafrat aur gale mil lījiye

zindagī kī justujū meñ ḳhud-kushī mat kījiye

jañg karnī hai to kiije ho magar aisī vo jañg

āsmāñ bhī jañg aisī dekh kar ho jaa.e dañg

jañg ke baare meñ ham bachchoñ kī ik tajvīz hai

taaki sab ḳhush ho ke boleñ jañg achchhī chiiz hai

aap ko ma.asūm bachchoñ kā hai gar kuchh bhī ḳhayāl

baiThe baiThe ek dam ho jā.iye ġhusse se laal

kho.e kī topeñ liye maidān meñ aa jā.iye

in se ras-gulloñ ke gole har taraf barsā.iye

mīThe gole aap kī topoñ ke ham khāte raheñ

hoñT ye qaumī tarāne dam-ba-dam gaate raheñ

hoñ har ik bandūq meñ rabḌī ke rañgīñ kartōs

aur har ik tank kī Tañkī meñ mausammī kā juice

aap ke dushman kī faujoñ ko ho jab ġhusse kī pyaas

pesh kiije muskurā kar un ko sharbat kā gilās

duudh ke sāgar meñ hoñ kuuze kī misrī ke jahāz

jis meñ hoñ jāsūs siine meñ liye toffē ke raaz

bam phaTeñ to un se nikleñ jhaT khilaune be-shumār

Thā ho aur lag jaa.e guDDoñ aur guḌiyoñ kī qatār

gar koī bīmār ho chillā rahā ho pen se

chokleT pahuñchā.iye jhaT us ko airplane se

koī nā-māqūl aa kar gāliyāñ bhī de agar

us se kahiye bhaag jā haT tere muñh meñ ghī shakar

tiir ulfat ke chaleñ golī chale ehsān kī

ḳhatm kar diije ra.ūnat is tarah insān kī

chappe chappe par jahāñ meñ aise atom-bomb phaTeñ

is jahālat ke añdhere meñ ujālā jo kareñ

rockitoñ meñ ho madad lākhoñ ġharīboñ ke liye

aur agan būToñ meñ ḳhushiyāñ bad-nasīboñ ke liye

bhūke bachchoñ par falak se roTiyāñ barsā.iye

moze juute kuchh qamīzeñ nekareñ phikvā.iye

jañg kī bārūd meñ zaa.e.a na kiije māl-o-zar

muskurā kar Dāliye lākhoñ ġharīboñ par nazar

jo ġharībī kī thakan se ho rahe haiñ chūr-chūr

un kī jebeñ fāltū noToñ se bhar diije huzūr

pyaar kā ulfat kā har zaḳhmī ko marham dījiye

apnī ḳhushiyāñ de ke dukh vāloñ ke dukh le lījiye

jo bhalā.ī meñ maza hai vo burā.ī meñ nahīñ

bandagī meñ jo maza hai vo ḳhudā.ī meñ nahīñ

ye jahāñ pyārā jahāñ kyuuñ jañg meñ barbād ho

is zamīñ par kyoñ na jannat pyaar kī ābād ho

joḌ kar ham haath nanhe ḳhat ko karte haiñ tamām

aap ke bachchoñ ko sab duniyā ke bachchoñ ko salām

ai chacha KHarru shichof ai mamun candy assalam

ek hi KHat hai ye mamun aur chacha donon ke nam

aap donon ka adab karna hamara farz hai

phir bhi sun lije jo chhoTi si hamari arz hai

aap donon hain bahadur surma kya is mein shak

ek baadal ki garaj hai ek shoale ki lapak

aap donon ke bayan sun sun ke Dar jate hain hum

dham se aa girte hain hum bachchon pe ye lafzon ke bam

Dar ke chhup jate hain apni maon ke aaghosh mein

kash hum behosh ho kar phir na aaen hosh mein

aap donon laD paDe to jaane kya ho jaega

do minute mein is jahan ka KHatma ho jaega

aag lag jaegi is duniya ko mar jaenge sab

jo bayan dete hain wo KHamosh ho jaenge lab

do minute zinda rahenge hum bhi marne ke liye

kaun phir baqi rahega raj karne ke liye

aisa lagta hai ki kuchh din aur jina hai muhaal

gar nahin apna to bachchon hi ka kuchh kije KHayal

ek taraf nafrat khaDi hai dusri jaanib ghurur

qahr ki chakki mein pis jaen na bachche be-qusur

le chuke hain aap to ji bhar ke duniya ke maze

hum ko in se dur rakhna chahte hain kis liye

gar ijazat ho to hum bachche bhi duniya dekh len

chaar din hum bhi ye bhaalu ka tamasha dekh len

kuchh bhi to school aur ghar ke siwa dekha nahin

aap kahiye aap ne duniya mein kya dekha nahin

jang mat kije na duniya ki imarat Dhaiye

sochiye kuchh ghaur kije dekhiye baz aaiye

aap ne duniya sajai thi miTane ke liye

aql ki shamen jalai thin bujhane ke liye

ilm-o-hikmat science ne ki thi taraqqi ke liye

aql ki shamen jalai thin bujhane ke liye

ilm-o-hikmat science ne ki thi taraqqi kis liye

nist-o-nabud aaj hum kar den use kya is liye

hum ne mana aap ka aapas mein hai kuchh iKHtilaf

ek jagah hum baiTh kar kar len na kyun dil apne saf

apni is duniya ki haalat is qadar jab zar hai

is ko dekhen chand mein jaana abhi be-kar hai

dur kije dil se nafrat aur gale mil lijiye

zindagi ki justuju mein KHud-kushi mat kijiye

jang karni hai to kije ho magar aisi wo jang

aasman bhi jang aisi dekh kar ho jae dang

jang ke bare mein hum bachchon ki ek tajwiz hai

taki sab KHush ho ke bolen jang achchhi chiz hai

aap ko masum bachchon ka hai gar kuchh bhi KHayal

baiThe baiThe ek dam ho jaiye ghusse se lal

khoe ki topen liye maidan mein aa jaiye

in se ras-gullon ke gole har taraf barsaiye

miThe gole aap ki topon ke hum khate rahen

honT ye qaumi tarane dam-ba-dam gate rahen

hon har ek banduq mein rabDi ke rangin kartoos

aur har ek tank ki Tanki mein mausammi ka juice

aap ke dushman ki faujon ko ho jab ghusse ki pyas

pesh kije muskura kar un ko sharbat ka gilas

dudh ke sagar mein hon kuze ki misri ke jahaz

jis mein hon jasus sine mein liye toffee ke raaz

bam phaTen to un se niklen jhaT khilaune be-shumar

Tha ho aur lag jae guDDon aur guDiyon ki qatar

gar koi bimar ho chilla raha ho pen se

chokleT pahunchaiye jhaT us ko airplane se

koi na-maqul aa kar galiyan bhi de agar

us se kahiye bhag ja haT tere munh mein ghi shakar

tir ulfat ke chalen goli chale ehsan ki

KHatm kar dije raunat is tarah insan ki

chappe chappe par jahan mein aise atom-bomb phaTen

is jahaalat ke andhere mein ujala jo karen

rockiton mein ho madad lakhon gharibon ke liye

aur agan buTon mein KHushiyan bad-nasibon ke liye

bhuke bachchon par falak se roTiyan barsaiye

moze jute kuchh qamizen nekaren phikwaiye

jang ki barud mein zaea na kije mal-o-zar

muskura kar Daliye lakhon gharibon par nazar

jo gharibi ki thakan se ho rahe hain chur-chur

un ki jeben faltu noTon se bhar dije huzur

pyar ka ulfat ka har zaKHmi ko marham dijiye

apni KHushiyan de ke dukh walon ke dukh le lijiye

jo bhalai mein maza hai wo burai mein nahin

bandagi mein jo maza hai wo KHudai mein nahin

ye jahan pyara jahan kyun jang mein barbaad ho

is zamin par kyon na jannat pyar ki aabaad ho

joD kar hum hath nanhe KHat ko karte hain tamam

aap ke bachchon ko sab duniya ke bachchon ko salam