bachchon ki qawwali

halve ke liye phir aaj bhī ham ik aas lagā.e baiThe haiñ

jo baat zabāñ par lā na sake vo dil meñ chhupā.e baiThe haiñ

thoḌī sī miThā.ī taaq pe thī muTThī meñ churā.e baiThe haiñ

abbū ke bhagā.e bhāge the ammī ke bulā.e baiThe haiñ

kuchh bach bhī ga.ī haiñ piTne se kuchh maar bhī khaa.e baiThe haiñ

tujh se to hameñ koī shikva ai ḳhāliq-e-sub.h-o-shām nahīñ

schōl hī aisā hai ki jahāñ kuchh chain nahīñ ārām nahīñ

is vaqt agarche sar meñ kisī ke dard barā.e naam nahīñ

har vaqt magar paḌhte rahnā kam-umroñ kā to kaam nahīñ

sab apnī apnī kursī par sudh-budh bisrā.e baiThe haiñ

ik baar kahīñ se mil jaatā ham sab ko charāġh-e-chain agar

bas saal meñ ik din paḌh lete darje kī kitābeñ far far far

phir ḳhvāb hī dilchaspī rahtī phir ḳhuub maza aatā din bhar

schōl meñ jaanā kyuuñ hotā har roz ye rahtā kyuuñ chakkar

ummīd nahīñ lekin phir bhī ummīd lagā.e baiThe haiñ

lekin ye zamāna ilm kā hai ye vaqt hai aage baḌhne kā

mil-jul ke kareñge gar mehnat ho jā.egā har sapnā puurā

himmat se huī haiñ tāmīreñ jur.at se huā hai kaam nayā

jab azm-o-amal achchhā hogā achchhā hī natīja bhī hogā

ham log yahāñ halva khā kar ik sham.a jalā.e baiThe haiñ

halwe ke liye phir aaj bhi hum ek aas lagae baiThe hain

jo baat zaban par la na sake wo dil mein chhupae baiThe hain

thoDi si miThai taq pe thi muTThi mein churae baiThe hain

abbu ke bhagae bhage the ammi ke bulae baiThe hain

kuchh bach bhi gai hain piTne se kuchh mar bhi khae baiThe hain

tujh se to hamein koi shikwa ai KHaliq-e-subh-o-sham nahin

school hi aisa hai ki jahan kuchh chain nahin aaram nahin

is waqt agarche sar mein kisi ke dard barae nam nahin

har waqt magar paDhte rahna kam-umron ka to kaam nahin

sab apni apni kursi par sudh-budh bisrae baiThe hain

ek bar kahin se mil jata hum sab ko charagh-e-chain agar

bas sal mein ek din paDh lete darje ki kitaben far far far

phir KHwab hi dilchaspi rahti phir KHub maza aata din bhar

school mein jaana kyun hota har roz ye rahta kyun chakkar

ummid nahin lekin phir bhi ummid lagae baiThe hain

lekin ye zamana ilm ka hai ye waqt hai aage baDhne ka

mil-jul ke karenge gar mehnat ho jaega har sapna pura

himmat se hui hain tamiren jurat se hua hai kaam naya

jab azm-o-amal achchha hoga achchha hi natija bhi hoga

hum log yahan halwa kha kar ek shama jalae baiThe hain