bachchon ki sarkar

baḌoñ kā raaj to sadiyoñ se hai zamāne meñ

kabhī huā nahīñ duniyā meñ raaj chhoToñ kā

agar hameñ bhī mile iḳhtiyār ai logo

to ham dikhā.eñ tumheñ kām-kāj chhoToñ kā

mulk meñ bachchoñ kī gar sarkār ho

zindagī ik jashn ik tehvār ho

hukm deñ aise calender ke liye

jis meñ do din baad ik itvār ho

sab ko deñ schōl jaisā uniform

ek sī har panT har shalvār ho

hostel ta.amīr ho sab ke liye

koī bhī insāñ na be-ghar-bār ho

rāshtra bhāshā ham ishāroñ ko banā.eñ

dakhkhin uttar meñ na phir takrār ho

ham minister hoñ to vo system bane

jis meñ muflis ho na sāhūkār ho

qaumī daulat ke ḳhazāne hoñ bhare

ḳhud hī le le jis ko jo darkār ho

iid dīvālī sabhī mil kar manā.eñ

aadmī ko aadmī se pyaar ho

mulk meñ bachchoñ kī gar sarkār ho

baDon ka raj to sadiyon se hai zamane mein

kabhi hua nahin duniya mein raj chhoTon ka

agar hamein bhi mile iKHtiyar ai logo

to hum dikhaen tumhein kaam-kaj chhoTon ka

mulk mein bachchon ki gar sarkar ho

zindagi ek jashn ek tehwar ho

hukm den aise calender ke liye

jis mein do din baad ek itwar ho

sab ko den school jaisa uniform

ek si har panT har shalwar ho

hostel tamir ho sab ke liye

koi bhi insan na be-ghar-bar ho

rashtra bhasha hum ishaaron ko banaen

dakhkhin uttar mein na phir takrar ho

hum minister hon to wo system bane

jis mein muflis ho na sahukar ho

qaumi daulat ke KHazane hon bhare

KHud hi le le jis ko jo darkar ho

id diwali sabhi mil kar manaen

aadmi ko aadmi se pyar ho

mulk mein bachchon ki gar sarkar ho